കാസര്‍കോട്: മത്സ്യബന്ധനത്തിനിടെ ബോട്ടില്‍നിന്ന് കടലിലേക്ക് തെറിച്ചുവീണ് തൊഴിലാളിയെ കാണാതായി. അടുക്കത്ത്ബയല്‍ കടപ്പുറത്ത് താമസിക്കുന്ന വടകര സ്വദേശി ശ്രീജിത്തി(42)നെയാണ് കാണാതായത്. ഇന്നലെ രാവിലെ കാസര്‍കോട് അഴിമുഖത്തുനിന്ന് നാല് കിലോമീറ്റര്‍ അകലെയാണ് സംഭവം. ശ്രീജിത്ത ഉള്‍പ്പെടെ നാലുപേരാണ് മത്സ്യ ബന്ധനത്തിനായി സിദ്ധിവിനായക എന്ന ബോട്ടില്‍ പുറപ്പെട്ടത്.
വലയെറിയുന്നതിനിടെ ശ്രീജിത്ത് കടലിലേക്ക് തെറിച്ചുവീഴുകയായിരുന്നുവെന്ന് മറ്റു തൊഴിലാളികള്‍ പറഞ്ഞു. ഇയാളെ രക്ഷപ്പെടുത്താന്‍ മറ്റുള്ളവര്‍ ശ്രമിച്ചെങ്കിലും ശ്രീജിത്ത് മുങ്ങി താണതായി പറയുന്നു. വിവരമറിഞ്ഞ് മറ്റു ബോട്ടുകളിലുള്ളവര്‍ തിരച്ചില്‍ നടത്തി വരുന്നുണ്ട്. കാസര്‍കോട് നിന്ന് അഗ്‌നിരക്ഷാ ശമന സേന, തീരദേശ പൊലിസ്, ടൗണ്‍ പൊലിസ് എന്നിവര്‍ സ്ഥലത്തെത്തിയിട്ടുണ്ട്.