ലഖ്‌നൗ: ഏതാനും ദിവസങ്ങള്‍ മാത്രം നീണ്ടു നിന്ന എസ്.പിയുമാള്ള ബന്ധത്തില്‍ വിള്ളല്‍ വീഴ്ത്തി ബി.എസ്.പിയുടെ പുതിയ നീക്കം. ലോക്‌സഭാ തെരഞ്ഞെടുപ്പിന് മുന്‍പുള്ള ഉത്തര്‍പ്രദേശ് ഉപതെരഞ്ഞെടുപ്പുകളിലൊന്നിലും എസ്.പിയുമായി സഖ്യമുണ്ടാകില്ലെന്നാണ് പാര്‍ട്ടി അധ്യക്ഷ മായാവതി ഇന്നലെ പ്രഖ്യാപിച്ചത്. കഴിഞ്ഞ ദിവസം എസ്.പിയുമായി ലോക്‌സഭാ തെരഞ്ഞെടുപ്പിലും സഖ്യം തുടരുമെന്ന് പ്രഖ്യാപിച്ചതിന് പിന്നാലെയാണ് ഇന്നലെ ഉപതെരഞ്ഞെടുപ്പുകളിലെ സഖ്യസാധ്യത അവര്‍ തള്ളിയത്.
ബി.എസ്.പിയുമായുള്ള സഖ്യത്തിലൂടെ ഗൊരഖ്പൂര്‍, ഫുല്‍പൂര്‍ മണ്ഡലത്തില്‍ ബി.ജെ.പിയെ ഞെട്ടിച്ചുകൊണ്ടുള്ള വിജയമാണ് എസ്.പി നേടിയത്. അടുത്ത് ഉപതെരഞ്ഞെടുപ്പ് നടക്കാനിരിക്കുന്ന കെയ്്‌രാന ലോക്‌സഭാ മണ്ഡലത്തിലേക്കും നൂര്‍പൂര്‍ നിയമസഭാ മണ്ഡലത്തിലേക്കും ബി.എസ്.പിയുടെ സഹായത്തോടെ വിജയിക്കാമെന്ന പ്രതീക്ഷയിലായിരുന്നു സമാജ് വാദി പാര്‍ട്ടി.
ഇതിനിടയിലാണ് 2019ലെ പൊതു തെരഞ്ഞെടുപ്പുവരെ ഇരുപാര്‍ട്ടികളും അവരവരുടെ രീതിയില്‍ മുന്നോട്ടുപോകുകയെന്ന നിര്‍ദേശം ബി.എസ്.പിയില്‍ നിന്നുണ്ടായത്.
ജില്ലാ, മേഖലാ കോ-ഓര്‍ഡിനേറ്റര്‍മാരുമായി നടത്തിയ ചര്‍ച്ചകള്‍ക്കു ശേഷം നടത്തിയ വാര്‍ത്താ സമ്മേളനത്തിലാണ് ബി.എസ്.പി അധ്യക്ഷ ഉപതെരഞ്ഞെടുപ്പുകളില്‍ രാഷ്ട്രീയ സഖ്യം വേണ്ടെന്ന് വ്യക്തമാക്കിയത്.
വരാനിരിക്കുന്ന ഉപതെരഞ്ഞെടുപ്പുകളില്‍ ഗൊരഖ്പൂരിലും ഫുല്‍പൂരിലും ഉണ്ടായതുപോലെ അണികളെ അടക്കി നിര്‍ത്താനാകില്ലെന്ന് മായാവതി പറഞ്ഞു.