ബന്തടുക്ക: ജോലി വാഗ്ദാനം നല്‍കി പ്രലോഭിപ്പിച്ചു പീഡിപ്പിച്ചതിനെ തുടര്‍ന്നു തീകൊളുത്തി ആത്മഹത്യക്കു ശ്രമിച്ച യുവതിയെ ഗുരുതരനിലയില്‍ മംഗളൂരുവിലെ ആശുപത്രിയില്‍ പ്രവേശിപ്പിച്ചു.
ബേഡകം പൊലിസ് സ്റ്റേഷന്‍ പരിധിയിലെ രണ്ടു കുട്ടികളുടെ അമ്മയായ 26കാരിയാണ് തീകൊളുത്തി ആത്മഹത്യക്കു ശ്രമിച്ചത്. സംഭവവുമായി ബന്ധപ്പെട്ട് യുവാവിനെതിരേ ബേഡകം പൊലിസ് ബലാത്സംഗത്തിനു കേസെടുത്തു. ആശുപത്രിയില്‍ കഴിയുന്ന യുവതിയുടെ രഹസ്യമൊഴി മജിസ്‌ട്രേറ്റും പൊലിസും രേഖപ്പെടുത്തി.
രണ്ടു ദിവസം മുമ്പാണ് കേസിനാസ്പദമായ സംഭവം. പരിയാരം മെഡിക്കല്‍ കോളജില്‍ ജോലി ശരിയാക്കിത്തരാമെന്നും കൂടിക്കാഴ്ചയ്ക്കായി പോവാമെന്നും യുവാവ് പറഞ്ഞതിനെ തുടര്‍ന്നു യുവതി യുവാവിനൊപ്പം പരിയാരത്ത് എത്തുകയായിരുന്നു. തുടര്‍ന്നു പരിയാരത്തെ ലോഡ്ജില്‍ മുറിയെടുത്തു പീഡിപ്പിക്കുകയായിരുന്നുവെന്നുമാണു പരാതി.
വീട്ടില്‍ തിരിച്ചെത്തിയ യുവതി ദേഹത്ത് മണ്ണെണ്ണയൊഴിച്ചു തീകൊളുത്തുകയായിരുന്നു. നേരത്തെ കാഞ്ഞങ്ങാട്ടെ ഒരു സ്ഥാപനത്തില്‍ യുവതിക്കു ജോലി തരപ്പെടുത്തി കൊടുത്തിരുന്നു. ഈ വിശ്വാസത്തിലാണ് യുവാവിനൊപ്പം പോയത്.
കാസര്‍കോട് ഡിവൈ.എസ്.പിയുടെ നിര്‍ദേശപ്രകാരം ആദൂര്‍ സി.ഐ മാത്യു, ബേഡകം എസ്.ഐ കെ. ദാമോദരന്‍ എന്നിവരുടെ നേതൃത്വത്തില്‍ അന്വേഷണം ആരംഭിച്ചിട്ടുണ്ട്.