കിളിമാനൂര്‍: മുന്‍ റേഡിയോ ജോക്കി മടവൂരിലെ രാജേഷിന്റെ കൊലപാതകവുമായി ബന്ധപ്പെട്ട് പൊലിസിന് നിര്‍ണായക വിവരങ്ങള്‍ ലഭിച്ചതായി സൂചന. അക്രമികള്‍ സഞ്ചരിച്ച കാറിന്റെ സിസിടിവി ദൃശ്യങ്ങള്‍ പുറത്തുവന്നു.

കൊലപാതകം നടന്ന സ്ഥലത്തേക്കു പോയ കാര്‍ കുറച്ചു സമത്തിനു ശേഷം തിരിച്ചു വരുന്നതാണ് ദൃശ്യത്തില്‍ ഉള്ളത്. എന്നാല്‍ കാറിന്റെ നമ്പര്‍ സിസിടിവിയില്‍ വ്യക്തമല്ല.

കേസില്‍ പൊലിസ് അന്വേഷണം ഊര്‍ജിതമാക്കിയിട്ടുണ്ട്.

ചൊവ്വാഴ്ച പുലര്‍ച്ചെയാണ് കാറിലെത്തിയ സംഘം മടവൂര്‍ പടിഞ്ഞാറ്റേല ഐക്കരഴികം ആശാനിവാസില്‍ രാധാകൃഷ്ണന്‍ ഉണ്ണിത്താന്റെ മകന്‍ രാജേഷി (35) നെ വെട്ടിക്കൊലപ്പെടുത്തിയത്.

കൊല്ലം സ്വദേശിനിയായ വീട്ടമ്മയുമായി രാജേഷിന് ഉണ്ടായിരുന്ന അടുപ്പത്തെ തുടര്‍ന്ന് യുവതിയുടെ ഭര്‍ത്താവ് ഏര്‍പ്പെടുത്തിയ ക്വട്ടേഷന്‍ സംഘമാണ് കൃത്യം നിര്‍വഹിച്ചതെന്നാണ് നാട്ടുകാര്‍ പറയുന്നത്.

പൊലിസിന് പ്രതികളെക്കുറിച്ച് വ്യക്തമായ സൂചന ലഭിച്ചിട്ടുണ്ടെന്ന് അന്വേഷണ ചുമതലയുള്ള കിളിമാനൂര്‍ സി.ഐ പ്രദീപ് കുമാര്‍ പറഞ്ഞു.

അന്വേഷണത്തെ ബാധിക്കുമെന്നതിനാല്‍ പ്രതികളെ കുറിച്ച് കൂടുതല്‍ വെളിപ്പെടുത്താന്‍ പൊലിസ് തയാറായിട്ടില്ല. രാജേഷിന്റെ മൊബൈല്‍ ഫോണ്‍ കേന്ദ്രീകരിച്ചുള്ള വിവരങ്ങളും വാട്‌സ്ആപ്പ് സന്ദേശങ്ങളും സൈബര്‍ സെല്‍ പരിശോധിച്ചുവരുകയാണ്.

രാജേഷിനൊപ്പം വെട്ടേറ്റ സുഹൃത്ത് കിളിമാനൂര്‍ വെള്ളല്ലൂര്‍ സ്വദേശി കുട്ടനില്‍നിന്ന് പൊലിസ് മൊഴി എടുത്തിരുന്നു. കുട്ടന്‍ തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികിത്സയിലാണ്.

തിരുവനന്തപുരം റൂറല്‍ എസ്.പി അശോക് കുമാര്‍, ആറ്റിങ്ങല്‍ ഡി.വൈ.എസ്.പി അനില്‍കുമാര്‍, കിളിമാനൂര്‍ സി.ഐ പ്രദീപ് കുമാര്‍ എന്നിവരുടെ നേതൃത്വത്തിലുള്ള പൊലിസ് സംഘം ആണ് അന്വേഷിക്കുന്നത്.

നാടന്‍പാട്ടു കലാകാരനും സൗണ്ട് റിക്കാര്‍ഡിസ്റ്റും രാജേഷ് മെട്രാസ് മീഡിയ ആന്‍ഡ് കമ്മ്യൂണിക്കേഷന്‍ എന്ന സ്ഥാപനം നടത്തുന്നയാളുമായിരുന്ന രാജേഷ് സ്വന്തം സ്ഥാപനത്തില്‍വച്ചാണ് കൊല്ലപ്പെട്ടത്.