മൊബൈല്‍ ഫോണ്‍ നിര്‍മാണത്തില്‍ കുതിച്ചുകൊണ്ടിരിക്കുന്ന ചൈനീസ് കമ്പനികളില്‍ പ്രധാനിയാണ് വിവോ. ആന്‍ഡ്രോയിഡ് കുടുംബത്തിലേക്ക് ആകര്‍ഷണീയമായ ഒരു പുതിയ മോഡലിറക്കി വിവോ ഇ-മാര്‍ക്കറ്റിങ്ങില്‍ തരംഗമാവുകയാണ്. വിവോ വി- 9 എന്ന മോഡലാണ് പുതുതായി വിപണിയിലെത്തിയത്.
ക്വാല്‍കോം സ്‌നാപ്ഡ്രാഗണ്‍ 626 പ്രൊസസറാണ് വി- 9നില്‍ ഉപയോഗിച്ചിട്ടുള്ളത്. 4 ജി.ബി റാമും 64 ജി.ബി റോമുമായി പുറത്തിറങ്ങിയ ഫോണിന്റെ വില 22,990 രൂപയാണ്. 256 ജി.ബി വരെയുള്ള മെമ്മറി കാര്‍ഡ് ഇതില്‍ ഉപയോഗിക്കാം. 6.3 ഇഞ്ച് വലിപ്പമുള്ള ഫോണില്‍ 19:9 ഫുള്‍ എച്ച്.ഡി ഡിസ്‌പ്ലേയുള്ളതിനാല്‍ വിഡിയോയുടെയും ഫോട്ടോയുടെയും യഥാര്‍ഥ ഭംഗി ആസ്വദിക്കാന്‍ കഴിയും. ഫേസ് ആപ്പ് ലോക്ക് ആണ് വി-9ന്റെ മറ്റൊരു പ്രധാന പ്രത്യേകത. നമ്മുടെ മുഖം കാമറയിലൂടെ സ്‌കാന്‍ ചെയ്യുന്നതോടെ ആപ്ലിക്കേഷന്‍ നമുക്ക് എത്രയും വേഗത്തില്‍ ഓപ്പണ്‍ ചെയ്യാന്‍ കഴിയും. കൂടാതെ ഫിംഗര്‍പ്രിന്റ് ലോക്ക് ഫോണിനെ കൂടുതല്‍ സുരക്ഷിതമാക്കുന്നു. ഫേസ് ആപ്പ് ലോക്കിലൂടെ നമുക്ക് നമ്മുടെ പ്രധാനപ്പെട്ടവയെല്ലാം കൂടുതല്‍ സുരക്ഷയോടെ സൂക്ഷിക്കാം.
ആന്‍ഡ്രോയിഡ് ഒറിയോ 8.1 ഓഎസില്‍ പ്രവര്‍ത്തിക്കുന്ന ഫോണില്‍ 3260 എ.എ.എച്ച് ബാറ്ററിയാണുള്ളത്. ആമസോണിലും ഫ്‌ളിപ്കാര്‍ട്ടിലും ചുരുങ്ങിയ സമയം കൊണ്ടാണ് ഇതു വിറ്റുതീരുന്നത്. ഷവോമിയുടെ റെഡ്മി നോട്ട്- 5 പ്രോ എന്ന മോഡലിനും ഓണ്‍ലൈന്‍ വിപണിയില്‍ നല്ല മാര്‍ക്കറ്റാണ്.

കാമറ ഫീച്ചേഴ്‌സ്

ഒരു പുതിയ മെബൈല്‍ ഫോണ്‍ വാങ്ങുമ്പോള്‍ അധികമാളുകളും ഏറ്റവും കൂടുതല്‍ ശ്രദ്ധിക്കുന്നത് മൊബൈലിന്റെ കാമറ നിലവാരമാണ്. (മെഗാപിക്‌സല്‍ കൂടിയ മൊബൈല്‍ ഫോണ്‍). ഡി.എസ്.എല്‍.ആര്‍ കാമറകളെ വെല്ലുന്ന തരത്തിലുള്ള ഫീച്ചേഴ്‌സുകളാണ് മൊബൈല്‍ കാമറകളിലുള്ളത്.
സെല്‍ഫിക്ക് മുന്‍തൂക്കം നല്‍കുന്ന 24 മെഗാപിക്‌സല്‍ മുന്‍കാമറയും 16+5 മെഗാപിക്‌സെല്‍ പിന്‍കാമറയുമാണ് വിവോ വി-9നെ മറ്റുള്ള മോഡലുകളില്‍ നിന്ന് വേറിട്ടുനിര്‍ത്തുന്നത്. പിന്നില്‍ ഡ്യുവല്‍ കാമറയുള്ളതിനാല്‍ എടുക്കുന്ന ചിത്രങ്ങള്‍ക്ക് ഡി.എസ്.എല്‍.ആര്‍ പ്രതീതി അനുഭവപ്പെടും. 4-കെ വിഡിയോ റെക്കാര്‍ഡിങ്ങും ഇതിന്റെ ആഘര്‍ഷണങ്ങളില്‍ ഒന്നാണ്.