ഇന്ത്യയുടെ സ്ഥിര ബ്രോഡ്ബാന്‍ഡ് ഡൗണ്‍ലോഡിങ് വേഗതയില്‍ വര്‍ധനവ്. ഊക്‌ല സ്പീഡ് ടെസ്റ്റ് ഗ്ലോബല്‍ ഇന്‍ഡക്‌സ് പുറത്തുവിട്ട ഫെബ്രുവരി മാസത്തെ കണക്കനുസരിച്ച് ആഗോള തലത്തില്‍ ഇന്ത്യ ഇപ്പോള്‍ 67-ാം സ്ഥാനത്താണ്. നവംബറില്‍ 76-ാം സ്ഥാനത്തായിരുന്നു രാജ്യം.
സിങ്കപ്പൂരാണ് ബ്രോഡ്ബാന്‍ഡ് വേഗതയില്‍ മുന്നില്‍ (161.53). ആഗോള ശരാശരി 42.71 നവംബറിലെ കണക്കനുസരിച്ച് സെക്കന്റില്‍ 18.82 എം.ബി ശരാശരി ബ്രോഡ്ബാന്‍ഡ് ഡൗണ്‍ലോഡ് സ്പീഡ് എന്ന നിലയിലായിരുന്നെങ്കില്‍ 20.72 ആണ് ഇപ്പോഴത്തെ വേഗത.
ബ്രോഡ്ബാന്‍ഡ് ഡൗണ്‍ലോഡിങ്ങില്‍ ചൈന 20ഉം ശ്രീലങ്ക 76ഉം സ്ഥാനത്താണുള്ളത്. എന്നാല്‍ മൊബൈല്‍ ഇന്റര്‍നെറ്റ് വേഗതയുടെ കാര്യത്തില്‍ (ഡൗണ്‍ലോഡ് വേഗത) ഇന്ത്യ 109-ാം സ്ഥാനത്താണ്. നവംബറിലെ കണക്കിനേക്കാള്‍ ഫ്രെബ്രുവരിയില്‍ വേഗത ഉയര്‍ന്നെങ്കിലും ലോക റാങ്കിങ്ങില്‍ മാറ്റമുണ്ടായിട്ടില്ല.
മൊബൈല്‍ ഇന്റര്‍നെറ്റ് ബ്രോഡ്ബാന്‍ഡ് ഡൗണ്‍ലോഡിങ് വേഗതയില്‍ അയല്‍രാജ്യങ്ങളായ ചൈന 26, ശ്രീലങ്ക 82, പാകിസ്താന്‍ 92, ബംഗ്ലാദേശ് 115 എന്നീ സ്ഥാനത്താണ്.
വലിയ ജനസംഖ്യയുള്ള രാജ്യങ്ങള്‍ക്കിടയില്‍ ഉപഭോക്താക്കളുടെ കാര്യത്തില്‍ ഇന്ത്യ മുന്നിലാണെങ്കിലും ഇന്റര്‍നെറ്റ് വേഗതയുടെ കാര്യത്തില്‍ പിറകിലാണെന്നതാണ് സത്യം.
പതിവായി ഇന്റര്‍നെറ്റ് ഉപയോഗിക്കുന്നവരില്‍നിന്ന് നേരിട്ട് വിവരം ശേഖരിച്ചാണ് ഡൗണ്‍ലോഡിങ് വേഗത സംബന്ധിച്ച ഊക്‌ല പഠനം നടത്തിയത്. ഇതില്‍ 439 എണ്ണം ഇന്ത്യയിലെ സര്‍വറുകളില്‍ നിന്നാണ്.