മാഡ്രിഡ്: സ്പാനിഷ് ലാ ലിഗ പോരാട്ടത്തില്‍ കരുത്തരായ റയല്‍ മാഡ്രിഡിന് ജയം. മറ്റൊരു മത്സരത്തില്‍ ബാഴ്‌സലോണ തോല്‍വിയില്‍ നിന്ന് സമനില പാലിച്ച് മത്സരം രക്ഷിച്ചെടുത്ത് അപരാജിത ലീഡ് നിലനിര്‍ത്തി. ലാസ് പാല്‍മസിനെ എതിരില്ലാത്ത മൂന്ന് ഗോളുകള്‍ക്കാണ് റയല്‍ പരാജപ്പെടുത്തിയത്. സൂപ്പര്‍ താരം ക്രിസ്റ്റ്യാനോ റൊണാള്‍ഡോ ഇല്ലാതെയാണ് റയല്‍ ഇറങ്ങിയത്. റയലിന് വേണ്ടി ഗെരത് ബെയ്ല്‍ (26, 51 - പെനാല്‍റ്റി), കരീം ബെന്‍സേമ (39 - പെനാല്‍റ്റി) എന്നിവര്‍ ഗോള്‍ നേടി.
തോല്‍വി മുന്നില്‍ കണ്ട ബാഴ്‌സലോണ സെവിയ്യയുമായാണ് 2-2ന് സമനില വഴങ്ങി മുഖം രക്ഷിച്ചത്. 88ാം മിനുട്ട് വരെ 2-0ത്തിന് പരാജയത്തിന്റെ വക്കില്‍ നിന്ന ബാഴ്‌സലോണ രണ്ട് മിനുട്ടിനിടെ നേടിയ രണ്ട് ഗോളുകളുടെ ബലത്തിലാണ് സെവിയ്യയെ സമനിലയില്‍ പിടിച്ചത്. കളിയിലുടനീളം ആധിപത്യം പുലര്‍ത്തിയ സെവിയ്യ 36ാം മിനുട്ടില്‍ വാസ്‌കെസിലൂടെയും 50ാം മിനുട്ടില്‍ മുരിയയിലൂടെയും മുന്നിലെത്തിയെങ്കിലും 88ാം മിനുട്ടില്‍ സുവാരസും 89ാം മിനുട്ടില്‍ മെസ്സിയും നേടിയ ഗോളില്‍ കളി സമനിലയില്‍ അവസാനിപ്പിക്കുകയായിരുന്നു.
30 കളികളില്‍ നിന്ന് 23 ജയവും ഏഴ് സമനിലയുമടക്കം 76 പോയിന്റോടെ ബാഴ്‌സലോണയാണ് പട്ടികയില്‍ ഒന്നാമത്. 29 കളികളില്‍ നിന്ന് 19 ജയവും ഏഴ് സമനിലയും മൂന്ന് തോല്‍വിയുമായി 64 പോയിന്റോടെ അത്‌ലറ്റിക്കോ മാഡ്രിഡ് രണ്ടാം സ്ഥാനത്തും 30 കളികളില്‍ നിന്ന് 19 ജയവും ആറ് സമനിലയും അഞ്ച് തോല്‍വിയുമായി റയല്‍ മാഡ്രിഡ് മൂന്നാം സ്ഥാനത്തും നില്‍ക്കുന്നു.