മുംബൈ: അപരാജിത മുന്നേറ്റവുമായി കേരളം അണ്ടര്‍ 23 വനിതാ ടി20 പോരാട്ടത്തിന്റെ ഫൈനലിലേക്ക് കുതിച്ച് ചരിത്ര നേട്ടം സ്വന്തമാക്കി. നിര്‍ണായകമായ പോരാട്ടത്തില്‍ മുംബൈ ടീമിനെ നാല് റണ്‍സിന് കീഴടക്കിയാണ് കേരളം കലാശപ്പോരിന് അര്‍ഹത നേടിയത്. നാളെ നടക്കുന്ന ഫൈനലില്‍ മഹാരാഷ്ട്രയാണ് കേരളത്തിന്റെ എതിരാളി.
ആദ്യം ബാറ്റ് ചെയ്ത കേരളം നിശ്ചിത 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 89 റണ്‍സെടുത്തു. മുംബൈയുടെ പോരാട്ടം 19.5 ഓവറില്‍ 85 റണ്‍സില്‍ അവസാനിപ്പിച്ചാണ് കേരളം വിജയം പിടിച്ചത്. അനായാസ ലക്ഷ്യത്തിലേക്ക് ബാറ്റേന്തിയ മുംബൈ നിരയെ മികച്ച ബൗളിങ്, ഫീല്‍ഡിങ് പ്രകടനങ്ങളിലൂടെയാണ് കേരള വനിതകള്‍ പിടിച്ചുകെട്ടിയത്. മൂന്ന് റണ്ണൗട്ടുകളാണ് ഫീല്‍ഡര്‍മാര്‍ ഒരുക്കിയത്. മൂന്ന് വിക്കറ്റുകള്‍ വീഴ്ത്തി കീര്‍ത്തി ജെയിംസും രണ്ട് വിക്കറ്റെടുത്ത് മിന്നു മണിയും ബൗളിങില്‍ തിളങ്ങി.
നേരത്തെ ടോസ് നേടി കേരളം ബാറ്റിങിനിറങ്ങുകയായിരുന്നു. 25 റണ്‍സെടുത്ത് പുറത്താകാതെ നിന്ന ദൃശ്യ ഐ.വിയാണ് ടോപ് സ്‌കോറര്‍. ഓപണര്‍ ജിലു ജോര്‍ജ് 23ഉം ആരതി ജയഗോപാല്‍ 13ഉം ജുപ്‌സ ജോസഫ് 10ഉം റണ്‍സെടുത്ത് രണ്ടക്കം കടന്നു. മറ്റൊരാളും രണ്ടക്കം കണ്ടില്ല.