പാലക്കാട്: അപ്രതീക്ഷിതമായി പെയ്തിറങ്ങിയ വേനല്‍ മഴയില്‍ ജില്ലയില്‍ വ്യാപകനാശനഷ്ടം, പലയിടത്തും മരങ്ങള്‍ വീണ് വൈദ്യുതി നിലച്ചതോടെ ജില്ല പൂര്‍ണമായും ഇരുട്ടിലാണ്ടു. ഞായറാഴ്ചയാണ് കത്തുന്ന വെയിലിന് വിരാമമിട്ട് ജില്ലയില്‍ കനത്ത മഴ പെയ്തത്.
മഴയോടൊപ്പം ആഞ്ഞ് വീശിയ കാറ്റില്‍് മഴങ്ങള്‍ കടപുഴകി വീണു. വൈദ്യുതി നിലച്ചതോടൊപ്പം വ്യാപകമായ നാശനഷ്ടവും വിതച്ചു. പാലക്കാട് നഗരത്തില്‍ മഴയോടൊപ്പം വീണ ആലിപ്പഴക്കട്ടകളില്‍ നിരവധി വാഹനങ്ങള്‍ക്ക് കേട് പറ്റി.
വാഹനത്തിലുണ്ടായിരുന്ന പലരും അത്ഭുതകരമായാണ് രക്ഷപ്പെട്ടത്. പാലക്കാട് നഗരത്തില്‍ വൈകിട്ട് അഞ്ച് മണിയോടെ നിലച്ച് വൈദ്യുതി രാത്രി പത്തരയോടെയാണ് പുനഃസ്ഥാപിച്ചത്.
ആലത്തൂര്‍, തരൂര്‍, തുടങ്ങി ഗ്രാമീണ മേഖലകളില്‍ ഇന്നലെ ഉച്ചയോടെയാണ് വൈദ്യുതി വന്നത്.മുതലമട നണ്ടന്‍കിഴായ കൊട്ടപ്പള്ളം എസ് സി, എസ് ടി കോളനിയില്‍ നിരവധി വീടുകളാണ് തകര്‍ന്നത്. കാറ്റടിച്ചപ്പോള്‍ പലരും പുറത്ത് പോയതിനാല്‍ ആര്‍ക്കും പരുക്കില്ല. കൊടുവായൂരില്‍ ആല്‍മരം കടപുഴകി വൈദ്യുതി തൂണുകള്‍ നിലം പൊത്തി, നിരവധി വീടുകള്‍ക്ക് കേട് പാടുകള്‍ സംഭവിച്ചിട്ടുണ്ട്.
പലയിടത്തും വന്‍തോതില്‍ വാഴകൃഷി നാശം സംഭവിച്ചിട്ടുണ്ട്. ഇന്നലെ പണിമുടക്കിന് തുടര്‍ന്ന് റവന്യൂ ഉദ്യോഗസ്ഥര്‍മാര്‍ സംഭവ സ്ഥലം സന്ദര്‍ശിക്കാത്തതിനാല്‍ നാശനഷ്ടം കൃത്യമായി കണക്കെടുത്തിട്ടില്ലെന്ന് ബന്ധപ്പെട്ടവര്‍ അറിയിച്ചു.