കടുത്തുരുത്തി: കേരളാ വാട്ടര്‍ അതോറിറ്റിയുടെ നേതൃത്വത്തില്‍ കടുത്തുരുത്തി നിയോജകമണ്ഡലത്തിലെ വിവിധ ഗ്രാമപഞ്ചായത്തുകളില്‍ നടപ്പാക്കിയിട്ടുള്ള സമഗ്ര കുടിവെള്ള പദ്ധതിയുമായി ബന്ധപ്പെട്ട് നിലനില്‍ക്കുന്ന വിവിധ പരാതികള്‍ പരിഹരിക്കുന്നതിനും കുടിവെള്ള വിതരണം പരമാവധി വേഗത്തില്‍ ഫലപ്രദമായി നടപ്പാക്കുന്നതിനും ആവശ്യമായ തുടര്‍ നടപടികള്‍ സ്വീകരിക്കുന്നതിലേക്ക് ജനപ്രതിനിധികളുടേയും ഉദ്യോഗസ്ഥരുടേയും രണ്ടാമത് അവലോകന യോഗം 10ന് ഉച്ചകഴിഞ്ഞ് 2.30 ന് കടുത്തുരുത്തി കടപ്പൂരാന്‍ ഓഡിറ്റോറിയത്തില്‍ ചേരുമെന്ന് അഡ്വ. മോന്‍സ് ജോസഫ് എം.എല്‍.എ. അറിയിച്ചു. വരള്‍ച്ചക്കെടുതികളെ അതിജീവിക്കുന്നതിന് കടുത്തുരുത്തിയില്‍ കഴിഞ്ഞ മാസം ചേര്‍ന്ന യോഗത്തിന്റെ അടിസ്ഥാനത്തില്‍ കൈക്കൊണ്ട തീരുമാനങ്ങള്‍ നടപ്പാക്കുന്നതുമായി ബന്ധപ്പെട്ടുള്ള പ്രവര്‍ത്തന പുരോഗതി യോഗത്തില്‍ വിലയിരുത്തുന്നതാണ്.
വിവിധ പഞ്ചായത്തുകളില്‍ പൊതുമരാമത്ത് വകുപ്പും വാട്ടര്‍ അതോറിറ്റിയും തമ്മില്‍ പരിഹരിക്കപ്പെടാതെ നിലനില്‍ക്കുന്ന തര്‍ക്കങ്ങള്‍ സംബന്ധിച്ച് യോഗത്തില്‍ തീര്‍പ്പുണ്ടാക്കാന്‍ ആവശ്യമായ നടപടി സ്വീകരിക്കുമെന്ന് മോന്‍സ് ജോസഫ് എം.എല്‍.എ. അറിയിച്ചു. കേരളാ വാട്ടര്‍ അതോറിറ്റി സൂപ്രണ്ടിംഗ് എഞ്ചിനീയര്‍, പൊതുമരാമത്ത് വകുപ്പ് റോഡ്‌സ് വിഭാഗം, കെ.എസ്.റ്റി.പി. ഡിവിഷന്‍, വാട്ടര്‍ അതോറിറ്റി പ്രോജക്ട് ഡിവിഷനും, ഡിസ്ട്രിബ്യൂഷനും ഉള്‍പ്പെടെയുള്ള എക്‌സിക്യൂട്ടീവ് എഞ്ചിനീയര്‍മാര്‍, വിവിധ വകുപ്പ് അധികൃതര്‍ എന്നിവര്‍ ചര്‍ച്ചകള്‍ക്ക് നേതൃത്വം നല്‍കുന്നതാണ്.
കടുത്തുരുത്തി നിയോജകമണ്ഡലത്തില 11 പഞ്ചായത്ത് പ്രസിഡന്റുമാര്‍, ജില്ല - ബ്ലോക്ക് - ഗ്രാമപഞ്ചായത്ത് ജനപ്രതിനിധികള്‍ യോഗത്തില്‍ പങ്കെടുക്കുന്നതാണ്.