ദുബായ്: ഐസിസി ഏകദിന ബാറ്റർമാരുടെ റാങ്കിങ്ങിൽ ഒന്നാം സ്ഥാനത്തെത്തി  ഇന്ത്യൻ സൂപ്പർതാരം ശുഭ്മൻ ഗിൽ. 796 റേറ്റിംഗ് പോയിന്റുമായാണ് ഗിൽ ഒന്നാം സ്ഥാനം സ്വന്തമാക്കിയത്. ൭൭൩ പോയിന്റുകൾ ഉണ്ടായിരുന്ന പാകിസ്താൻ താരം ബാബർ അസമിനെ രണ്ടാം സ്ഥാനത്തേക്ക് പിന്തള്ളികൊണ്ടാണ് ഗില്ലിന്റെ ഒന്നാം സ്ഥാനത്തേക്കുള്ള മുന്നേറ്റം.

അടുത്തിടെ സ്വന്തം തട്ടകത്തിൽ ഇംഗ്ലണ്ടിനെതിരെ നടന്ന  ഏകദിന പരമ്പരയിലെ തകർപ്പൻ പ്രകടനങ്ങൾക്ക് പിന്നാലെയാണ് ഈ നേട്ടം ഗില്ലിനെ തേടിയെത്തിയത്. മൂന്ന് ഏകദിന മത്സരങ്ങളുടെ പരമ്പരയിൽ ഒരു സെഞ്ച്വറിയും രണ്ട് അർദ്ധ സെഞ്ച്വറിയുമാണ്  ഗിൽ അടിച്ചെടുത്തത്. 86.33 ശരാശരിയിൽ 259 റൺസായിരുന്നു ഗിൽ നേടിയത്. ഗില്ലിനു പുറമെ നാല് ഇന്ത്യൻ താരങ്ങളും ആദ്യ പത്തിൽ ഉണ്ട്. രോഹിത് ശർമ്മ മൂന്നാം സ്ഥാനത്തും വിരാട് കോഹ്‌ലി ആറാം സ്ഥാനത്തുമാണ് ഉള്ളത്. ശ്രേയസ് അയ്യർ ഒമ്പതാം സ്ഥാനത്തുമാണ് ഉള്ളത്. 

അതേസമയം ഐസിസി ചാമ്പ്യൻസ് ട്രോഫിയിൽ നാളെ നടക്കുന്ന ആദ്യ മത്സരത്തിനായുള്ള തയ്യാറെടുപ്പിലാണ് ഇന്ത്യൻ ടീം. ബംഗ്ലാദേശിനെതിരെയാണ് ടൂർണമെന്റിലെ ഇന്ത്യയുടെ ആദ്യ മത്സരം. ടൂർണമെന്റിൽ ഇന്ത്യൻ ടീമിന്റെ വൈസ് ക്യാപ്റ്റൻ കൂടിയാണ് ഗിൽ. താരത്തിന്റെ ഈ മിന്നും പ്രകടനം ചാമ്പ്യൻസ് ട്രോഫിയിലും ആവർത്തിക്കുമെന്നാണ് പ്രതീക്ഷിക്കുന്നത്. 

ഐസിസി ചാമ്പ്യൻസ് ട്രോഫിക്കുള്ള ഇന്ത്യൻ ടീം

രോഹിത് ശർമ്മ (ക്യാപ്റ്റൻ), ശുഭ്മാൻ ഗിൽ (വൈസ് ക്യാപ്റ്റൻ), വിരാട് കോഹ്‌ലി, ശ്രേയസ് അയ്യർ, കെ എൽ രാഹുൽ (വിക്കറ്റ് കീപ്പർ), റിഷബ് പന്ത് (വിക്കറ്റ് കീപ്പർ), ഹർദിക് പാണ്ഡ്യ, അക്സർ പട്ടേൽ, വാഷിങ്‌ടൺ സുന്ദർ, കുൽദീപ് യാദവ്, ഹർഷിത് റാണ, മുഹമ്മദ് ഷമി, അർഷ്ദീപ് സിങ്, രവീന്ദ്ര ജഡേജ, വരുൺ ചക്രവർത്തി.