ടൊറന്റോ: കനേഡിയന്‍ ഹോക്കി ടീം സഞ്ചരിച്ച ബസ് അപകടത്തില്‍പെട്ട് 14 മരണം. രാജ്യത്തെ ഒരു ജൂനിയര്‍ ഐസ് ഹോക്കി ടീം സഞ്ചരിച്ച ബസാണ് ലോറിയുമായി കൂട്ടിയിടിച്ച് വന്‍ ദുരന്തമുണ്ടായത്. കാനഡയിലെ സാസ്‌കാച്ചെവാനില്‍ പ്രാദേശിക സമയം വെള്ളിയാഴ്ച വൈകിട്ടാണു സംഭവം.
സാസ്‌കാച്ചെവാനിലെ ഐസ് ഹോക്കി ക്ലബായ ഹംബോള്‍ട്ട് ബ്രോണ്‍സിന്റെ താരങ്ങളാണ് അപകടത്തില്‍പെട്ടത്. അപകടസമയത്ത് ബസില്‍ ഡ്രൈവറടക്കം 28 പേരുണ്ടായിരുന്നു. 14 പേരെ ഗുരുതര പരുക്കുകളോടെ വിവിധ ആശുപത്രികളില്‍ പ്രവേശിപ്പിച്ചിട്ടുണ്ട്. മൂന്നുപേരുടെ നില അതീവ ഗുരുതരമാണ്. വൈകിട്ട് അഞ്ചോടെയാണ് ദേശീയപാത 35ല്‍ ബസും ലോറിയും കൂട്ടിയിടിച്ചത്. സാസ്‌കാച്ചെവാന്‍ ജൂനിയര്‍ ഹോക്കി ലീഗില്‍ പങ്കെടുക്കാനായി തിരിച്ചതായിരുന്നു താരങ്ങള്‍. അപകടത്തില്‍ കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോ അനുശോചനം രേഖപ്പെടുത്തി. ജീവന്‍ പൊലിഞ്ഞ താരങ്ങളുടെ മാതാപിതാക്കള്‍ ഇപ്പോള്‍ എന്ത് അവസ്ഥയിലായിരിക്കുമെന്നു തനിക്ക് ആലോചിക്കാന്‍ പോലുമാകുന്നില്ലെന്ന് ട്രൂഡോ ട്വീറ്റ് ചെയ്തു.