കൊല്ലം: മുത്വലാഖ് ചൊല്ലി വിവാഹബന്ധം വേര്‍പെടുത്തിയ ഭര്‍ത്താവ് 2,0,26,000 രൂപ ജീവനാംശമായി നല്‍കാന്‍ കൊല്ലം ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതി വിധിച്ചു. ഭര്‍ത്താവായിരുന്ന ആലപ്പുഴ ജില്ലയിലെ ചരുവിള വീട്ടില്‍ ഫിറോസിനെതിരേ നല്‍കിയ ഹര്‍ജിയിലാണ് വിധി.
2011 ഡിസംബര്‍ 18നാണ് എന്‍ജിനീയറായ ഫിറോസുമായുള്ള വിവാഹം നടന്നത്. രണ്ടു പേരുടെയും വിവാഹബന്ധത്തില്‍ ഒരു മകന്‍ ജനിച്ചിരുന്നു. എന്നാല്‍ 2013 സെപ്തംബര്‍ മൂന്നിന് ഭര്‍ത്താവായ ഫിറോസ് മുത്വലാഖ് ചൊല്ലി വിവാഹബന്ധം വേര്‍പ്പെടുത്തിയതായുള്ള ലെറ്റര്‍ യുവതിക്ക് അയച്ച് യുവതിയുമായുള്ള വിവാഹബന്ധം അവസാനിപ്പിച്ചു. ഇത് സ്വീകരിച്ച ശേഷമാണ് യുവതി കോടതിയെ സമീപിച്ചത്. യുവതിയുമായുള്ള വിവാഹബന്ധം വേര്‍പെടുത്തിയ ശേഷം ഫിറോസ് മറ്റൊരു വിവാഹം കഴിച്ചിരുന്നു.
വിവാഹ ബന്ധം വേര്‍പ്പെടുത്തിയ സമയത്തുള്ള ദമ്പതികളുടെ ജീവിത നിലവാരവും മുത്വലാഖ് വഴി വിവാഹബന്ധം വേര്‍പ്പെടുത്തിയത് മൂലം യുവതിക്കുണ്ടായ മനോവിഷമവും, യുവതിയുടെ പുനര്‍ വിവാഹം നടന്നിട്ടില്ലാത്തതും മുത്വലാഖിന് ശേഷം ഫിറോസിന്റെ പുനര്‍ വിവാഹം നടത്തിയതും കൂടി പരിഗണിച്ചായിരുന്നു കോടതി വിധി.
യുവതിക്ക് വേണ്ടി അഭിഭാഷകനായ കണ്ണനല്ലൂര്‍ എസ് അബ്ദുല്‍ കരീം ഹാജരായി.