ലണ്ടന്‍: മാഞ്ചസ്റ്റര്‍ യുനൈറ്റഡും മാഞ്ചസ്റ്റര്‍ സിറ്റിയും തമ്മിലുള്ള നാട്ടങ്കത്തില്‍ യുനൈറ്റഡിന് ജയം. സിറ്റിയുടെ തട്ടകമായ എത്തിഹാദ് സ്റ്റേഡിയത്തില്‍ അരങ്ങേറിയ ഡര്‍ബിയില്‍ രണ്ട് ഗോളിന് പിന്നില്‍ നിന്ന ശേഷമാണ് യുനൈറ്റഡ് ഗംഭീര വിജയം കുറിച്ചത്.
സ്വന്തം തട്ടകത്തില്‍ ചിരവൈരികളായ യുനൈറ്റഡിനെ കീഴടക്കി സീസണിലെ ഇംഗ്ലീഷ് പ്രീമിയര്‍ ലീഗ് കിരീടം ഉറപ്പിക്കാനുള്ള അവസരമാണ് സിറ്റിക്ക് നഷ്ടമായത്. അടുത്ത മത്സരത്തില്‍ വിജയിച്ച് സിറ്റിക്ക് കപ്പ് ഉറപ്പിക്കാം.
കളി തുടങ്ങി 25ാം മിനുട്ടില്‍ വിന്‍സന്റ് കോംപനിയും 30ാം മിനുട്ടില്‍ ഇല്‍കെ ഗുണ്ടഗനുമാണ് സിറ്റിക്ക് ലീഡൊരുക്കിയത്. എന്നാല്‍ രണ്ടാം പകുതി തുടങ്ങി 53, 55 മിനുട്ടുകളില്‍ രണ്ട് തവണ വല ചലിപ്പിച്ച് പോള്‍ പോഗ്ബ യുനൈറ്റഡിനെ മത്സരത്തിലേക്ക് മടക്കി കൊണ്ടുവന്നു. പിന്നാലെ 69ാം മിനുട്ടില്‍ ക്രിസ് സ്മാളിങ് യുനൈറ്റഡിന്റെ പട്ടിക പൂര്‍ത്തിയാക്കി.
മറ്റൊരു മത്സരത്തില്‍ ആഴ്‌സണല്‍ രണ്ടിനെതിരേ മൂന്ന് ഗോളുകള്‍ക്ക് സതാംപ്ടനെ വീഴ്ത്തി. ഗണ്ണേഴ്‌സിനായി ഡാനി വെല്‍ബെക്ക് ഇരട്ട ഗോള്‍ നേടിയപ്പോള്‍ ശേഷിച്ച ഗോള്‍ ഔബമേയങിന്റെ വകയായിരുന്നു.