ചെന്നൈ: ഐ.പി.എല്‍ മത്സരം നടക്കാനിരിക്കേ എം.എ ചിദംബരം സ്റ്റേഡിയത്തില്‍ കരിങ്കൊടി പ്രതിഷേധം. സംഭവത്തില്‍ 10 പേരെ പൊലിസ് അറസ്റ്റ് ചെയ്തു.

ചെന്നൈ സൂപ്പര്‍ കിങ്‌സ്- കൊല്‍ക്കത്ത നൈറ്റ് റൈഡേഴ്‌സ് മത്സരം നടക്കാനിരിക്കവെയാണ് കരിങ്കൊടി കാണിച്ചത്. തമിഴക വാഴ്‌വുരിമയ് കട്ചി (ടി.വി.കെ) യുടെ പത്തംഗങ്ങളാണ് അറസ്റ്റിലായത്.

കാവേരി നദീ ജല തര്‍ക്കത്തില്‍ തമിഴ്‌നാട്ടില്‍ പ്രതിഷേധം രൂക്ഷമാണ്. ഈ ഘട്ടത്തില്‍ ഐ.പി.എല്‍ കളിക്കുന്നതിനെതിരെയും പ്രതിഷേധം നടക്കുന്നുണ്ട്. ഐ.പി.എല്‍ മാച്ച് തടസ്സപ്പെടുത്തുമെന്ന് ടി.വി.കെ നേതാവ് ടി വേല്‍മുരുകന്‍ കഴിഞ്ഞയാഴ്ച പറഞ്ഞിരുന്നു.

ചെപൗക് എം.ആര്‍.ടി.എസ് റെയില്‍വെ സ്റ്റേഷനില്‍ നിന്ന് സ്റ്റേഡിയത്തിന്റെ പ്രധാന കവാടത്തിലേക്ക് പാര്‍ട്ടി പ്രവര്‍ത്തകര്‍ വരുകയും കരിങ്കൊടി ഉയര്‍ത്തുകയും ചെയ്യുകയായിരുന്നു. കൂടാതെ, സ്റ്റേഡിയത്തിനു പിന്നിലും നിരവധി പ്രവര്‍ത്തകര്‍ തടിച്ചുകൂടിയിട്ടുണ്ട്.

പ്രതിഷേധത്തേത്തുടര്‍ന്ന് കളിക്കാര്‍ താമസിക്കുന്ന ഹോട്ടലിന് കനത്ത സുരക്ഷയാണ് പൊലിസ് ഏര്‍പ്പെടുത്തിയിരിക്കുന്നത്.

4,000 പൊലിസ് ഉദ്യേഗസ്ഥര്‍, സായുധ സേനകള്‍, എലൈറ്റ് കമാന്‍ഡോ എന്നീ സുരക്ഷാ ഗ്രൂപ്പുകളെ സ്റ്റേഡിയത്തിലും സമീപത്തുമായി വിന്യസിച്ചിട്ടുണ്ട്.