ലണ്ടന്‍: അന്താരാഷ്ട്ര രാഷ്ട്രീയത്തില്‍ കോളിളക്കം സൃഷ്ടിച്ച രാസപ്രയോഗത്തിനിരയായ മുന്‍ ബ്രിട്ടീഷ് ഇരട്ടച്ചാരന്റെ മകള്‍ ആശുപത്രി വിട്ടു. റഷ്യന്‍ പൗരനായ സെര്‍ജി സ്‌ക്രിപാലിന്റെ മകള്‍ യൂലിയയെയാണ് ആരോഗ്യനില മെച്ചപ്പെട്ടതിനെ തുടര്‍ന്ന് ആശുപത്രിയില്‍നിന്നു മാറ്റിയത്.
സാലിസ്ബറി ജില്ലാ ആശുപത്രിയിലായിരുന്നു സ്‌ക്രിപാലിനൊപ്പം യൂലിയയ്ക്കും വിദഗ്ധ ചികിത്സ നല്‍കിയിരുന്നത്. 33കാരിയായ യൂലിയയെ ഇവിടെനിന്നു സുരക്ഷിതകേന്ദ്രത്തിലേക്കാണു മാറ്റിയിരിക്കുന്നത്. എന്നാല്‍, അവരുടെ ചികിത്സ അവസാനിച്ചിട്ടില്ലെന്നും ആരോഗ്യനിലയില്‍ പുരോഗതി കൈവരിച്ചതു കൊണ്ടാണ് ഡിസ്ചാര്‍ജ് ചെയ്തതെന്നും ആശുപത്രി വൃത്തങ്ങള്‍ അറിയിച്ചു.
അതേസമയം, സ്‌ക്രിപാല്‍ ആശുപത്രിയില്‍ തന്നെയാണുള്ളത്. മരുന്നുകളോടും ചികിത്സയോടും 66കാരനായ സ്‌ക്രിപാല്‍ പതിയെയാണു പ്രതികരിക്കുന്നതെന്ന് ഡോക്ടര്‍മാര്‍ പറഞ്ഞു. ആരോഗ്യനിലയില്‍ പുരോഗതിയുണ്ടെന്നും അധികം വൈകാതെ അദ്ദേഹത്തെയും ഡിസ്ചാര്‍ജ് ചെയ്യാനാകുമെന്നാണു പ്രതീക്ഷയെന്നും ഡോക്ടര്‍മാര്‍ അറിയിച്ചു.കഴിഞ്ഞ മാസം നാലിനായിരുന്നു സ്‌ക്രിപാലിനും യൂലിയയ്ക്കും നേരെ രാസപ്രയോഗമുണ്ടായത്. സാലിസ്ബറിയിലെ ഒരു ഷോപ്പിങ് മാളിനടുത്തുള്ള വിശ്രമകേന്ദ്രത്തില്‍ ഇരുവരെയും ബോധരഹിതരായി കണ്ടെത്തുകയായിരുന്നു. ഉടന്‍ തന്നെ പൊലിസ് വൃത്തങ്ങളെത്തി ഇവരെ ആശുപത്രിയില്‍ പ്രവേശിക്കുകയായിരുന്നു. ഇവര്‍ക്കുനേരെ വിഷാംശമടങ്ങിയ രാസപ്രയോഗം നടന്നതായി പരിശോധനയില്‍ വ്യക്തമായിരുന്നു. സോവിയറ്റ് യൂനിയന്‍ നിര്‍മിക്കുകയും റഷ്യ വികസിപ്പിക്കുകയും ചെയ്ത പ്രത്യേകതരം രാസായുധമാണ് ഇതെന്നും കണ്ടെത്തി. റഷ്യയാണ് സംഭവത്തിനു പിറകിലെന്ന് ബ്രിട്ടന്‍ ആരോപിച്ചു.