അർജന്റന്റൈൻ സൂപ്പർതാരം പൗലോ ഡിബാലയുടെ സിരി എയിലെ തകർപ്പൻ പ്രകടനങ്ങളെക്കുറിച്ച് സംസാരിക്കുകയാണ് ഇറ്റാലിയൻ ഇതിഹാസം ടോട്ടി. സിരി എയിൽ തന്റെ കളി ശൈലിയുമായി ഏറ്റവും സാമ്യമുള്ള താരമാണ്‌ ഡിബാലയെന്നാണ് ടോട്ടി പറഞ്ഞത്. വിവ എൽ ഫുട്ബോളിന് നൽകിയ ആഭിമുഖത്തിൽ സംസാരിക്കുകയായിരുന്നു ടോട്ടി. 

'സിരി എയിൽ ഇന്ന് കളിക്കുന്നവരിൽ എന്റെ കളി ശൈലിയുമായി സാമ്യമുള്ള താരം ഡിബാലയാണ്. പൗലോ ഒരു പ്രതിഭയാണ് അവൻ ഇറ്റലിയിൽ മാത്രം ഒതുങ്ങുന്നതല്ല. ഈ കാലത്ത് ധാരാളം താരങ്ങൾ ഉണ്ട്. ഇന്ന് ലോകഫുട്ബോളിൽ അവനെ പോലെ കളിക്കുന്ന അഞ്ച് താരങ്ങളുണ്ട്. അതിലൊരാൾ ലാമിന് യമാലാണ്,' ടോട്ടി പറഞ്ഞു. 

എഎസ് റോമക്ക് വേണ്ടി ഈ സീസണിൽ മിന്നും ഫോമിലാണ് ഡിബാല കളിക്കുന്നത്. ഇതിനോടകം തന്നെ ഈ സീസണിൽ എട്ട് ഗോളുകളും നാല് അസിസ്റ്റുകളുമാണ് അർജന്റൈൻ താരം നേടിയിട്ടുള്ളത്. കഴിഞ്ഞ സീസണിൽ 13 ഗോളുകളും ഒമ്പത് അസിസ്റ്റുകളുമാണ് ഡിബാല സ്വന്തമാക്കിയിരുന്നത്. 

റോമക്കൊപ്പം പെനാൽറ്റികൾ ഗോളാക്കി മാറ്റുന്നതിൽ ഡിബലക്കുള്ള റെക്കോർഡ് ഏറെ ശ്രദ്ധേയമാണ്. ഡിബാല എഎസ് റോമക്ക് വേണ്ടി നേടിയ എല്ലാ പെനാൽറ്റിയും കൃത്യമായി ഗോളാക്കി മാറ്റിയിട്ടുണ്ട്. 17 പെനാൽറ്റികളും ഒന്ന് പോലും പിഴക്കാതെ താരം ലക്ഷ്യത്തിൽ എത്തിക്കുകയായിരുന്നു.

സീരി എയിൽ വെനീസിയക്കെതിരെയായ മത്സരത്തിൽ ഡിബാല പെനാൽറ്റി ഗോളാക്കി മാറ്റിയിരുന്നു. പിയർ ലൂയിജി പെൻസോ സ്റ്റേഡിയത്തിൽ നടന്ന മത്സരത്തിൽ എതിരില്ലാത്ത ഒരു ഗോളിനായിരുന്നു റോമ വിജയിച്ചത്. മത്സരത്തിന്റെ രണ്ടാം പകുതിയിൽ 57ാം മിനിറ്റിൽ ലഭിച്ച പെനാൽറ്റി കൃത്യമായി ലക്ഷ്യത്തിലെത്തിച്ചു കൊണ്ടാണ് ഡിബാല റോമയ്ക്ക് വിജയം സമ്മാനിച്ചത്.

നിലവിൽ സിരി എ പോയിന്റ് പട്ടികയിൽ എട്ടാം സ്ഥാനത്താണ് എഎസ് റോമ. 27 മത്സരങ്ങളിൽ നിന്നും 12 വിജയവും 7 സമനിലയും 8 തോൽവിയും അടക്കം 43 പോയിന്റാണ് റോമയുടെ കൈവശമുള്ളത്. 58 പോയിന്റുമായി ഇന്റർ മിലാൻ ഒന്നാം സ്ഥാനത്തും 57 പോയിന്റോടെ നാപോളി രണ്ടാം സ്ഥാനത്തുമാണ് ഉള്ളത്.