കരുണാഗപ്പള്ളി: മുന്‍ റേഡിയോ ജോക്കിയും ഗായകനുമായ രാജേഷിനെ കൊല്ലാന്‍ ഉപയോഗിച്ച ആയുധങ്ങള്‍ പൊലിസ് കണ്ടെടുത്തു. കരുനാഗപ്പള്ളിയിലെ കന്നേറ്റി കായലില്‍നിന്നാണ് കണ്ടെടുത്തത്.

മുഖ്യപ്രതി അലിഭായിയുമായി പൊലിസ് സംഘം നടത്തിയ തിരച്ചിലിനൊടുവിലാണ് ആയുധങ്ങള്‍ കണ്ടെടുത്തത്. ഒരു വാളും ഒരു കത്തിയുമാണ് കണ്ടെടുത്തത്.

കൃത്യം നടത്തിയതിനു ശേഷം വടിവാളും രക്തം പുരണ്ട വസ്ത്രവും പ്ലാസ്റ്റിക്ക് കവറിലാക്കി കന്നേറ്റി പാലത്തില്‍ നിന്നും തെക്കുഭാഗത്തേക്ക് വലിച്ചെറിഞ്ഞെന്ന പ്രതികളുടെ മൊഴിയുടെ അടിസ്ഥാനത്തിലായിരുന്നു തെളിവെടുപ്പ്.

ആറ്റിങ്ങല്‍ ഡിവൈ.എസ്.പി പി അനില്‍കുമാര്‍, സിഐമാരായ പ്രദീപ്കുമാര്‍ വി.എസ്, അനില്‍കുമാര്‍ എം, രമേശ് കുമാര്‍ പി.വി എന്നിവരുടെ നേതൃത്വത്തിലുള്ള പ്രത്യേക അന്വേഷണ സംഘമാണ് തെളിവെടുപ്പിനായി എത്തിയത്.