പുനലൂര്‍: കായിക കരുത്തറിയിച്ച തൊഴിലാളികളുടെ വടംവലി മത്സരം മലയോര നാടിന് ആവേശമായി.
മെയ് രണ്ടിനും മൂന്നിനും കൊല്ലത്ത് സി.ഐ.ടി.യു നടത്തുന്ന സംസ്ഥാന കായിക മേളയുടെ ഭാഗമായുള്ള ജില്ലാതല വടംവലി മത്സരമാണ് ചെമ്മന്തൂര്‍ മുനിസിപ്പല്‍ ബസ്സ്റ്റാന്റില്‍ നടന്നത്. നൂറു കണക്കിന് കാണികള്‍ മത്സരാര്‍ത്ഥികള്‍ക്ക് പിന്തുണയേകിയതോടെ ഇഞ്ചോടിഞ്ച് പോരാട്ടമായി വടം വലി മത്സരം മാറി.
ഫ്‌ളവേഴ്‌സ് ചാനല്‍ എം.ഡി ശ്രീകണ്ഠന്‍ നായര്‍ മത്സരം ഉദ്ഘാടനം ചെയ്തു. കാഷ്യു സെന്റര്‍ (സി.ഐ.റ്റി.യു) സംസ്ഥാന പ്രസിഡന്റ് കെ രാജഗോപാല്‍ അധ്യക്ഷനായി. സംസ്ഥാന കായികമേള സംഘാടക സമിതി ചെയര്‍മാന്‍ എസ് ജയമോഹന്‍,സി.പി.എം ജില്ലാ സെക്രട്ടറിയേറ്റ് അംഗംജോര്‍ജ് മാത്യു, മുനിസിപ്പല്‍ ചെയര്‍മാന്‍ എം.എ രാജ ഗോപാല്‍,പുനലൂര്‍ ഏരിയാ സെക്രട്ടറി എസ് ബിജു, ടൈറ്റസ് സെബാസ്റ്റ്യന്‍,എം.ഐ ആന്റണി സംസാരിച്ചു.
വിവിധ തൊഴില്‍ മേഖലകളില്‍ നിന്നും എട്ട് ടീമുകളാണ് ജില്ലാ മത്സരത്തില്‍ മാറ്റുരച്ചത്. പുരുഷന്മാരുടെ മത്സരത്തില്‍ പുനലൂര്‍ ഓട്ടോറിക്ഷാ തൊഴിലാളി യൂനിയന്‍ നേതൃത്വത്തിലുള്ള ടീം ജേതാക്കളായി. 3333 രൂപയും ട്രോഫിയും സ്വന്തമാക്കി.
രണ്ടാം സ്ഥാനം അഞ്ചല്‍ ഹെഡ് ലോഡ് വര്‍ക്കേഴ്‌സ് യൂനിയന്‍ ടീം നേടി. 2222 രൂപയും ട്രോഫിയും ഇവര്‍ക്ക് നല്‍കി. വനിതകളുടെ മത്സരത്തില്‍ കൊല്ലം ദേശീയ സമ്പാദ്യ പദ്ധതി തൊഴിലാളി യൂനിയന്‍ ടീമാണ് വിജയിച്ചത്.