പുത്തനത്താണി: ദേശീയപാത വെട്ടിച്ചിറയില്‍ ഹര്‍ത്താല്‍ അനുകൂലികളും പൊലിസും തമ്മില്‍ സംഘര്‍ഷം. പൊലിസ് ലാത്തിച്ചാര്‍ജില്‍ ഒരാള്‍ക്കും കല്ലേറില്‍ നാലു പൊലിസുകാര്‍ക്കും പരുക്കേറ്റു. കോഴിക്കോട്ടുനിന്നു കൊട്ടാരക്കരയിലേക്കു സര്‍വിസ് നടത്തുകയായിരുന്ന കെ.എസ്.ആര്‍.ടി.സി സൂപ്പര്‍ ഫാസ്റ്റ് ബസിന്റെ ഗ്ലാസുകള്‍ സമരക്കാരുടെ കല്ലേറില്‍ തകര്‍ന്നു.
തൃശൂരില്‍നിന്നു കോഴിക്കോട്ടേക്കു സര്‍വിസ് നടത്തുകയായിരുന്ന സ്വകാര്യ ബസ് വെട്ടിച്ചിറയില്‍ എറിഞ്ഞുതകര്‍ത്തു. കോട്ടക്കലില്‍ പത്തു പേരെ അറസ്റ്റ് ചെയ്തു. വെട്ടിച്ചിറയില്‍നിന്ന് ഏഴു പേരെയും കല്‍പകഞ്ചേരിയില്‍ നാലു പേരെയും അറസ്റ്റ് ചെയ്തു. നൂറോളം പേര്‍ക്കെതിരേ കേസെടുത്തു.