കൊടുവള്ളി: സമൂഹ മാധ്യമങ്ങള്‍ വഴിയുള്ള ആഹ്വാനത്തെ തുടര്‍ന്നുണ്ടായ ഹര്‍ത്താലിനിടെ കൊടുവള്ളിയിലെ വിവിധ ഭാഗങ്ങളില്‍ നടന്ന അക്രമ സംഭവങ്ങളുമായി ബന്ധപ്പെട്ട് പൊലിസ് കസ്റ്റഡിയിലെടുത്ത 20 പേരെ താമരശ്ശേരി കോടതി റിമാന്‍ഡ് ചെയ്തു.
ഇതില്‍ താമരശ്ശേരി ഡിവൈ.എസ്.പിയുടെ വാഹനത്തിന് കല്ലെറിഞ്ഞ് ഡിവൈ.എസ്.പിയെ പരുക്കേല്‍പ്പിച്ച സംഭവത്തില്‍ പിടിയിലായവര്‍ക്കെതിരേ ജാമ്യമില്ലാ വകുപ്പ് പ്രകാരമാണ് കേസെടുത്തത്. ദേശീയപാതയില്‍ വാവാട് സെന്ററിലാണ് ഡിവൈ.എസ്.പിയുടെ വാഹനത്തിന് നേരെ അക്രമമുണ്ടായത്. കൊടുവള്ളിയില്‍ ദേശീയപാത ഉപരോധിക്കുകയും ഗതാഗതം തടസപ്പെടുത്തുകയും ചെയ്തതിനാണ് 17 പേര്‍ക്കെതിരേ കേസെടുത്തത്.
സമൂഹമാധ്യമങ്ങള്‍ വഴി ഹര്‍ത്താലിന് ആഹ്വാനം ചെയ്യുകയും മതസ്പര്‍ദ്ദ വളര്‍ത്തുന്ന രീതിയില്‍ പ്രചാരണം നടത്തുകയും ചെയ്തതിന് യുവാവിനെതിരേ പൊലിസ് കേസെടുത്തു. കൊടുവള്ളി വെള്ളച്ചാലില്‍ മുനിയാവ എന്ന മുനീറിനെതിരേയാണ് 153 എ വകുപ്പ് പ്രകാരം കേസെടുത്തത്. തിങ്കളാഴ്ചത്തെ അക്രമസംഭവങ്ങളില്‍ കണ്ടാലറിയാവുന്ന 100 പേര്‍ക്കെതിരേയാണ് പൊലിസ് കേസെടുത്തത്.
താമരശേരിയില്‍ ഹര്‍ത്താലിനെ തുടര്‍ന്ന് നടന്ന അനിഷ്ട സംഭവത്തില്‍ മൂന്നുപേര്‍ കൂടി റിമാന്‍ഡിലായി. വാടിക്കല്‍ തൂവ്വക്കുന്നുമ്മല്‍ ഫര്‍ഷാദ് (21), അവേലം വെളുപ്പാന്‍ചാലില്‍ കബീര്‍ റഹ്മാന്‍ (29), കോരങ്ങാട് ഇല്ലിപ്പറമ്പില്‍ അബ്ദുല്‍ ഷാനിദ് (34) എന്നിവരാണ് റിമാന്‍ഡിലായത്.
തച്ചംപൊയിലിലുണ്ടണ്ടായ അക്രമത്തില്‍ പൊതുമുതല്‍ നശിപ്പിച്ച കേസിലാണ് ഇവര്‍ അറസ്റ്റിലായത്. ഇതേകേസില്‍ അറസ്റ്റിലായ അഞ്ചുപേരെ താമരശേരി കോടതി തിങ്കളാഴ്ച റിമാന്‍ഡ് ചെയ്തിരുന്നു.