ടൊറന്റോ: കാനഡയിലെ ടൊറന്റോയില്‍ ആള്‍ക്കൂട്ടത്തിലേക്ക് വാഹനം ഇടിച്ചുകയറ്റിയതിനെ തുടര്‍ന്ന് പത്തുപേര്‍ മരിച്ചു. 15 പേര്‍ക്ക് പരുക്കേറ്റു. അലക് മിനാസ്സയിന്‍(25) എന്നയാള്‍ വഴിയാത്രക്കാരിലേക്ക് വാന്‍ ഇടിച്ചുകയറ്റുകയായിരുന്നു. ഇയാളെ പൊലിസ് പിടികൂടി.
ഫിഞ്ച് ആന്‍ഡ് യങ് സ്ട്രീറ്റിന് സമീപം പ്രാദേശിക സമയം ഇന്നലെ ഉച്ചയ്ക്ക് ഒന്നരയോടെയാണ് സംഭവം. റൈഡര്‍ ട്രക്ക് ആന്‍ഡ് റെന്‍ഡര്‍ എന്ന് രേഖപ്പെടുത്തിയ വാന്‍ അലക് മിനാസ്സയിന്‍ മന:പ്പൂര്‍വം ഓടിച്ചുകയറ്റുകയായിരുന്നു.
എന്നെ വെടിവയ്ക്കൂ, എന്ന് ആക്രോശിച്ച് ഇയാള്‍ പൊലിസിന് നേരെ അടുെത്തങ്കിലും ഓഫിസര്‍മാരില്‍ ഒരാള്‍ മുന്നോട്ടാഞ്ഞതോടെ ഇയാള്‍ കീഴടങ്ങുകയായിരുന്നെന്നാണ് ദൃക്‌സാക്ഷികളുടെ വിവരണം.
അക്രമി ആക്രോശിക്കുന്ന വിഡിയോ മാധ്യമങ്ങള്‍ പുറത്തു വിട്ടു.വാനിന്റെ മുന്‍വശം പൂര്‍ണമായും തകര്‍ന്ന നിലയിലാണ്. അക്രമിക്ക് പിന്നില്‍ തീവ്രവാദ ബന്ധമുണ്ടോയെന്ന കാര്യം വ്യക്തമല്ല. സംഭവം അവിവേക ആക്രമമാണെന്നും ഭയപ്പെടുത്തുന്ന ദുരന്തമാണെന്നും കാനഡ പ്രധാനമന്ത്രി ജസ്റ്റിന്‍ ട്രൂഡോ പറഞ്ഞു. കൂടുതല്‍ അപകടമില്ലാതെ അക്രമിയെ കീഴ്‌പ്പെടുത്തിയ പൊലിസിനെ ട്രൂഡോ പ്രശംസിച്ചു.
കാനഡ പൗരന്മാര്‍ക്ക് എല്ലാവിധ പിന്തുണയും അറിയിക്കുന്നുവെന്ന് വൈറ്റ് ഹൗസ് പ്രസ്താവനിയില്‍ പറഞ്ഞു. അക്രമിയെ സംബന്ധിച്ച് മുന്‍പ് അറിയില്ലെന്നും മന:പ്പൂര്‍വം നടത്തിയ പ്രവര്‍ത്തിയാണിതെന്നും ടൊറന്റോ പൊലിസ് മേധാവി മാര്‍ക്ക് സോന്റേര്‍സ് പറഞ്ഞു.