മിലാന്‍: ഇറ്റലി ദേശീയ ഫുട്‌ബോള്‍ ടീമിന്റെ പരിശീലക സ്ഥാനത്തേക്ക് മുന്‍ ബയേണ്‍ മ്യൂണിക്ക് പരിശീലകന്‍ കാര്‍ലോ ആന്‍സലോട്ടിക്ക് സാധ്യതയേറി. ഇറ്റാലിയന്‍ ഫുട്‌ബോള്‍ ഫെഡേറഷന്‍ അധികൃതരുമായി ആന്‍സലോട്ടി ചര്‍ച്ച നടത്തിയതായി റിപ്പോര്‍ട്ടുകള്‍ പുറത്തുവന്നു. അതേസമയം ആന്‍സലോട്ടിയുമായി പ്രാഥമിക ചര്‍ച്ചകള്‍ മാത്രമാണ് നടത്തിയിട്ടുള്ളതെന്നും പരിശീലകനായി അദ്ദേഹത്തെ ഉറപ്പിച്ചിട്ടില്ലെന്നും അധികൃതര്‍ വെളിപ്പെടുത്തി. ഇക്കഴിഞ്ഞ സെപ്റ്റംബറില്‍ ബയേണ്‍ മ്യൂണിക്കിന്റെ പരിശീലക സ്ഥാനത്ത് നിന്ന് പുറത്താക്കിയ ശേഷം ആന്‍സലോട്ടി മറ്റൊരു ടീമിന്റേയും കോച്ചായി സ്ഥാനമേറ്റിട്ടില്ല. റഷ്യന്‍ ലോകകപ്പിന് യോഗ്യത നേടാന്‍ ഇറ്റാലിയന്‍ ടീമിന് സാധിക്കാതെ പോയതിനെ തുടര്‍ന്ന് പരിശീലകനായിരുന്ന ജിയാന്‍ പിയറോ വെന്റുറ രാജിവച്ച ഒഴിവിലേക്ക് ഇതുവരെ ഒരു സ്ഥിരം പരിശീലകനെ നിയമിച്ചിട്ടില്ല. നിലവില്‍ ല്യുഗി ഡി ബിയാജിയോ ആണ് ടീമിന്റെ താത്കാലിക പരിശീലകന്‍.