മലപ്പുറം: പാണക്കാട് സയ്യിദ് മുഹമ്മദലി ശിഹാബ് തങ്ങള്‍ അനുസ്മരണവും തങ്ങളുടെ ജീവിതത്തെ ആസ്പദമാക്കി പുറത്തിറക്കിയ പ്രഥമ ആപ്ലിക്കേഷനായ 'ശിഹാബ് വൈസ്' സംബന്ധമായി പാണക്കാട് കോര്‍ണര്‍ ഓണ്‍ലൈന്‍ പോര്‍ട്ടല്‍ സംഘടിപ്പിച്ച മത്സര വിജയികള്‍ക്കുള്ള അവാര്‍ഡ് ദാനവും നാളെ വൈകിട്ട് മൂന്നിന് മലപ്പുറം ഖാഇദെമില്ലത്ത് സ്മാരക സൗധത്തില്‍ നടക്കും. രാവിലെ പാണക്കാട് മഖാമില്‍ സിയാറത്ത് നടക്കും.
വൈകിട്ട് മൂന്നിന് കോട്ടുമല കോംപ്ലക്‌സ് വിദ്യാര്‍ഥികള്‍ ശിഹാബ് തങ്ങളെ അനുസ്മരിച്ച് 'പ്യാരെ ശിഹാബ്' ഖവ്വാലി അവതരിപ്പിക്കും.
നാലിന് ആരംഭിക്കുന്ന അനുസ്മരണ പരിപാടി പാണക്കാട് സയ്യിദ് ഹമീദലി ശിഹാബ് തങ്ങള്‍ ഉദ്ഘാടനം ചെയ്യും. പാണക്കാട് സയ്യിദ് ബഷീറലി ശിഹാബ് തങ്ങള്‍ അധ്യക്ഷനാകും. പാണക്കാട് അബ്ബാസലി ശിഹാബ് തങ്ങളുടെ പുത്രന്‍ ഹാഫിള് സയ്യിദ് സ്വിദ്ഖലി ശിഹാബ് തങ്ങള്‍ ഖുര്‍ആന്‍ പാരായണം നടത്തും. ചെങ്കോട്ടുകാവിലെ ക്ഷേത്ര മേല്‍ശാന്തി ഹരികൃഷ്ണന്‍ നമ്പൂതിരി മുഖ്യാതിഥിയാകും. ശിഹാബ് വൈസ് ആപ് മത്സര വിജയികളെ പ്രഖ്യാപിക്കലും അവാര്‍ഡ് ദാനവും സര്‍ട്ടിഫിക്കറ്റ് വിതരണവും ചടങ്ങില്‍ നടക്കും. തുടര്‍ന്ന് ബഷീര്‍ ഫൈസി ദേശമംഗലം, മുനീര്‍ ഹുദവി വിളയില്‍ തുടങ്ങിയവര്‍ ശിഹാബ് തങ്ങള്‍ അനുസ്മരണ പ്രഭാഷണം നടത്തും.
'ശിഹാബ് വൈസ്' ആപ് നിര്‍മാതാക്കളായ പ്രമുഖ പ്രവാസി എഴുത്തുകാരന്‍ മുജീബ് ജൈഹൂന്‍ ഷാര്‍ജ, ആര്‍ട്ടിസ്റ്റ് ഷിയാസ് അഹമദ് ഹുദവി തുടങ്ങിയവര്‍ ആപ്പ് വേദിയില്‍ പരിചയപ്പെടുത്തും. ശിഹാബ് തങ്ങളുടെ ഉദ്ധരണികള്‍ ഉള്‍പ്പെടുത്തി പുറത്തിറങ്ങിയ 'സ്ലോഗന്‍സ് ഓഫ് ദി സേജ്' പുസ്തകം ഗ്രന്ഥകാരന്‍ മുജീബ് ജൈഹൂന്‍ വേദിയില്‍ ഹരികൃഷ്ണന്‍ നമ്പൂതിരിക്ക് സമ്മാനിക്കും.
ആസിഫ് ദാരിമി പുളിക്കല്‍, ഷിഹാസ് സുല്‍ത്താന്‍ അജ്മാന്‍, അസ്‌ലം ഹാഫിസ് കൊയിലാണ്ടി, കെ.എം.എസ് മൗലവി, സ്വഫുവാന്‍ വി.ടി പുതുപ്പറമ്പ്, റിഷാദ് കളത്തിങ്ങല്‍, മുഹിയിദ്ദീന്‍ വയനാട്, സല്‍മാന്‍ കാവനൂര്‍, ഷഫീഖ് പാണക്കാട്, മുനവ്വര്‍ കാവനൂര്‍ സംബന്ധിക്കും.