പാലക്കാട്: ചിട്ടയായ ശ്രമങ്ങള്‍ വിജയതീരത്തേക്ക് എത്തിക്കുമെന്ന് പാലക്കാട് എസ്.പി പ്രദീഷ്‌കുമാര്‍. സുപ്രഭാതവും കോട്ടക്കല്‍ ബി. സ്‌കൂളും ചേര്‍ന്ന് പ്ലസ്ടു, ഡിഗ്രി വിദ്യാര്‍ഥികള്‍ക്കായി പാലക്കാട് ഹോട്ടല്‍ ഗസാലയില്‍ സംഘടിപ്പിച്ച കരിയര്‍ ഗൈഡന്‍സ് പ്രോഗ്രാം ഉദ്ഘാടനം ചെയ്യുകയായിരുന്നു അദ്ദേഹം. ജീവിതത്തില്‍ മുന്നേറാന്‍ വ്യക്തമായ ദിശാബോധം ഉണ്ടാകണം.
കഠിനപ്രയത്‌നം നടത്തുന്നവരാണ് ലോകത്ത് തന്റേതായ കൈയൊപ്പ് പതിപ്പിച്ചവരൊക്കെയും. പരിശ്രമങ്ങള്‍ ഇല്ലാത്തവര്‍ ജീവിതത്തില്‍ ഒന്നുമാകാതെ കടന്നുപോകുമെന്നും അദ്ദേഹം പറഞ്ഞു.
വിജ്ഞാന കുതുകികളായ വിദ്യാര്‍ഥികളെ തന്റെ ഓഫിസിലേക്ക് മുഴുസമയവും സ്വാഗതം ചെയ്യുന്നതായും പ്രദീഷ്‌കുമാര്‍ കൂട്ടിച്ചേര്‍ത്തു. സുപ്രഭാതം പ്രത്യേക ലേഖകന്‍ ഫൈസല്‍ കോങ്ങാട് അധ്യക്ഷനായി. ബി. സ്‌കൂള്‍ ആര്‍.പിമാരായ ഫൈസല്‍ പി. സഈദ്, ടി.എം മന്‍സൂര്‍ അലി ക്ലാസുകള്‍ നയിച്ചു. സുപ്രഭാതം റസിഡന്റ് മാനേജര്‍ ഇ.കെ ഷാനവാസ്, മുഹമ്മദ് നാഫി, ബി. സ്‌കൂള്‍ ഡയരക്ടര്‍മാരായ ശിഹാബുദ്ദീന്‍, ബീന ശ്രീനിവാസ്, യു.കെ പ്രോഗ്രാം കോഡിനേറ്റര്‍ ജാബിര്‍ സംസാരിച്ചു. സുപ്രഭാതം ചീഫ് റിപ്പോര്‍ട്ടര്‍ പി.വി.എസ് ശിഹാബ് സ്വാഗതവും ജംഷീര്‍ നന്ദിയും പറഞ്ഞു.