ഇരിങ്ങാലക്കുട: നഗരസഭയില്‍ സെക്രട്ടറി വിളിച്ചു ചേര്‍ത്ത എന്‍ജിനിയറിങ് വിഭാഗത്തിലെ ഉദ്യോഗസ്ഥരുടെ യോഗം എല്‍.ഡി.എഫ് കൗണ്‍സിലര്‍മാര്‍ ഉപരോധിച്ചു. ഇന്നലെ ഉച്ചതിരിഞ്ഞു സെക്രട്ടറിയുടെ ക്യാബിനില്‍ നടന്ന യോഗത്തിലാണ് എല്‍.ഡി.എഫ് കൗണ്‍സിലര്‍മാര്‍ പ്രതിഷേധവുമായി എത്തിയത്.
ന്‍ജിനിയറിങ് വിഭാഗത്തിലെ അനാസ്ഥക്കും മെല്ലെപോക്കിനുമെതിരായിരുന്നു എല്‍.ഡി.എഫ് കൗണ്‍സിലര്‍മാരുടെ പ്രതിഷേധം. പൊതുജനങ്ങളുടെ ഫയലുകള്‍ മാസങ്ങളോളം വച്ചു താമസിപ്പിക്കുകയും ബന്ധപ്പെട്ട രജിസ്റ്ററുകള്‍ ഉദ്യോഗസ്ഥര്‍ സൂക്ഷിക്കാതിരിക്കുകയുമാണ്.
അതിനുപുറമെ പല ഫയലുകളും ഓഫിസില്‍ നിന്ന് കാണാതാവുന്ന സാഹചര്യവും നിലവിലുണ്ടെന്നും സമരത്തിനു നേതൃത്വം നല്‍കിയ കൗണ്‍സിലര്‍മാരായ പി.വി ശിവകുമാര്‍, സി.സി ഷിബിന്‍, അല്‍ഫോന്‍സാ തോമസ്, പി.സി മുരളീധരന്‍ പറഞ്ഞു. പൊതുജനങ്ങളോടു ധാര്‍ഷ്ട്യവും കരാറുകാരോടു സൗമനസ്യവും പ്രകടിപ്പിക്കുന്ന പല ഉദ്യോഗസ്ഥരും ഇക്കൂട്ടത്തിലുണ്ടെന്നു കൗണ്‍സിലര്‍മാര്‍ ആരോപിച്ചു.
ഉദ്യോഗസ്ഥര്‍ സമയത്തു ഓഫിസില്‍ വരാതിരിക്കുകയും നഗരസഭാ വാഹനം അനധികൃതമായി ഉപയോഗിക്കുന്നുണ്ടെന്നും കൗണ്‍സിലര്‍മാര്‍ പരാതിപ്പെട്ടു. കൗണ്‍സിലര്‍മാരുടെ വികാരം മനസിലാകുന്നുണ്ടെന്നും പരാതികള്‍ പരിഹരിക്കാന്‍ വേണ്ട നടപടികള്‍ എടുക്കാമെന്നും സെക്രട്ടറി ഉറപ്പു നല്‍കി. ഇതിനെ തുടര്‍ന്നാണു കൗണ്‍സിലര്‍മാര്‍ സമരം അവസാനിപ്പിച്ചു പിരിഞ്ഞുപോയത്. എല്‍.ഡി.എഫ് കൗണ്‍സിലര്‍മാര്‍ ഉപരോധിച്ച സംഭവത്തില്‍ ഉദ്യോഗസ്ഥര്‍ പ്രതിഷേധിച്ചു. ഫയലുകള്‍ എല്ലാംതന്നെ സമയബന്ധിതമായി നീങ്ങുന്നുണ്ടെന്നും ആരോപണങ്ങള്‍ക്കു കഴമ്പില്ലെന്നും നഗരസഭാ സെക്രട്ടറി ഒ.എന്‍ അജിത് കുമാര്‍ പറഞ്ഞു.
ഈ സംഭവത്തില്‍ ഉദ്യോഗസ്ഥര്‍ പ്രതിഷേധതിലാണെന്നും സെക്രട്ടറി പറഞ്ഞു. സ്വാഭാവികമായുണ്ടാക്കുന്ന താമസങ്ങള്‍ മാത്രമേ ഫയലുകളുടെ കാര്യത്തില്‍ ഇരിങ്ങാലക്കുട നഗരസഭയില്‍ ഉണ്ടാകുന്നുള്ളുവെന്നും അദ്ദേഹം കൂട്ടിച്ചേര്‍ത്തു. എല്‍.ഡി.എഫ് കൗണ്‍സിലര്‍മാര്‍ നടത്തിയ ഉപരോധസമരം തികച്ചും രാഷ്ട്രീയ പ്രേരിതമാണെന്നു നഗരസഭാ ചെയര്‍പേഴ്‌സണ്‍ നിമ്യ ഷിജു പറഞ്ഞു.
നഗരസഭയില്‍ ഒരു വികസന പ്രവര്‍ത്തനവും സുഗമമായി നടത്താന്‍ സമ്മതിക്കാതിരിക്കുകയെന്ന ഗൂഢലക്ഷ്യവും ഇതിനുപുറകിലുണ്ടെന്നു ചെയര്‍പേഴ്‌സന്‍ കുറ്റപ്പെടുത്തി.
എല്‍.ഡി.എഫിന്റെ ചില സ്ഥാപിത താല്‍പര്യക്കാര്‍ക്കു അനര്‍ഹമായി ഉദ്യോഗസ്ഥ തലത്തില്‍ കാര്യങ്ങള്‍ ചെയ്തുകൊടുക്കാന്‍ പറ്റാത്തതിലുള്ള എതിര്‍പ്പിന്റെ പ്രതിഫലനമാണു ഉദ്യോഗസ്ഥര്‍ക്കെതിരേ ആരോപണങ്ങള്‍ ഉന്നയിക്കുന്നതെന്നു സ്റ്റാന്റിങ് കമ്മിറ്റി ചെയര്‍മാന്‍ വി.സി വര്‍ഗീസ് പറഞ്ഞു.