പയ്യന്നൂര്‍: ഐസ്‌ക്രീമില്‍ നിന്ന് പുഴുവിനെ കണ്ടെത്തിയതിനെ തുടര്‍ന്ന് കടയില്‍ നിന്ന് മൊബൈലില്‍ വീഡിയോ ചിത്രീകരിക്കുകയും നവമാധ്യങ്ങളിലൂടെ പ്രചരിപ്പിക്കുകയും ചെയ്ത യുവാവിനെതിരേ കടയുടമ പയ്യന്നൂര്‍ പൊലിസില്‍ പരാതി നല്‍കി.
ഈ മാസം പതൊന്‍പതാം തിയതി ഉച്ചയോടെ പൊരിങ്ങോം വയക്കര സ്വദേശിയായ യുവാവാണ് കണ്ടോത്ത് കോത്തായിമുക്കിലെ കടയില്‍ നിന്ന് കോണ്‍ ഐസ്‌ക്രീം വാങ്ങിയത്. ഐസ്‌ക്രീം കഴിക്കാനായി കവര്‍ മാറ്റിയപ്പോഴാണ് ഐസ്‌ക്രീമില്‍ പുഴുക്കളെ കണ്ടത്. തുടര്‍ന്ന് ദൃശ്യങ്ങള്‍ മൊബൈലില്‍ പകര്‍ത്തുകയും നവമാധ്യമങ്ങളില്‍ പോസ്റ്റ് ചെയ്യുകയും ചെയ്തു. വീഡിയോ വൈറലായതോടെയാണ് കടയുടമ പരാതിയുമായി പയ്യന്നൂര്‍ പൊലിസ് സ്റ്റേഷനിലെത്തിയത്. ഇന്നലെ രാവിലെയോടെ കടയുടമയേയും ഉപഭോക്താവിനെയും പൊലിസ് സ്റ്റേഷനില്‍ വിളിച്ചുവരുത്തി പ്രശ്‌നം രമ്യതയില്‍ പരിഹരിക്കാന്‍ ശ്രമം നടന്നെങ്കിലും കടയുടമ കേസിന്റെ വഴിക്കുതന്നെ കാര്യങ്ങള്‍ നടക്കട്ടെയെന്നുള്ള നടപടിയാണ് കൈക്കൊണ്ടത്. എന്നാല്‍ സംഭവം നഗരസഭാ ആരോഗ്യ വകുപ്പ് അധികൃതരെ അറിയിക്കാതെ പുഴു അടങ്ങിയ ഐസ്‌ക്രീം കടയിലേല്‍പ്പിച്ച് പോയത് യുവാവിന് വിനയായി തീര്‍ന്നിരിക്കുകയാണ്. യുവാവ് ഉപഭോക്തൃ കോടതിയില്‍ പരാതി നല്‍കാനുള്ള തയാറെടുപ്പിലാണ്.