ന്യൂഡല്‍ഹി: തൃണമൂല്‍ കോണ്‍ഗ്രസ് വിട്ട മുന്‍ ഇന്ത്യന്‍ ഫുട്‌ബോള്‍ താരം ബൈച്ചൂങ് ബൂട്ടിയ പുതിയ രാഷ്ട്രീയ പാര്‍ട്ടി പ്രഖ്യാപിച്ചു. ഹംരോ സിക്കിം എന്നാണ് പാര്‍ട്ടിയുടെ പേര്. ഇന്നലെ ഡല്‍ഹിയിലാണ് അദ്ദേഹം പുതിയ പാര്‍ട്ടിയുടെ പ്രഖ്യാപനം നടത്തിയത്. സിക്കിം കേന്ദ്രീകരിച്ചായിരിക്കും പ്രവര്‍ത്തനമെന്നും ബൂട്ടിയ വ്യക്തമാക്കി.
പാര്‍ട്ടിയില്‍ യുവാക്കള്‍ക്ക് കൂടുതല്‍ പ്രാതിനിധ്യം ഉണ്ടായിരിക്കുമെന്ന് പറഞ്ഞ അദ്ദേഹം തന്റെ പാര്‍ട്ടിയെ സിക്കിമിലെ ജനങ്ങള്‍ക്ക് മുന്‍പാകെ സമര്‍പ്പിക്കുന്നുവെന്നും വ്യക്തമാക്കി.
20 വര്‍ഷംകൊണ്ട് ഫുട്‌ബോളിലൂടെ താന്‍ നേടിയെടുത്ത സല്‍പ്പേര് രാഷ്ട്രീയത്തിന്റെ പേരില്‍ നശിപ്പിക്കില്ലെന്ന് ബൂട്ടിയ പറഞ്ഞു. യുവജനങ്ങളുടെ പ്രാധിനിധ്യമാണ് മുഖ്യം. അവര്‍ക്കായി ഒരു പാട് കാര്യങ്ങള്‍ പാര്‍ട്ടിയുടെ അജന്‍ഡയിലുണ്ടായിരിക്കുമെന്ന് അദ്ദേഹം അറിയിച്ചു. പാര്‍ട്ടി രൂപീകരണവുമായി ബന്ധപ്പെട്ട കാര്യം കഴിഞ്ഞ ദിവസം അദ്ദേഹം ഔദ്യോഗികമായി ട്വിറ്ററിലൂടെ അറിയിച്ചിരുന്നു. 2013ല്‍ മമത ബാനര്‍ജിയുമായി കൂട്ടുചേര്‍ന്ന് രാഷ്ട്രീയത്തില്‍ ചുവടുറപ്പിച്ച ബൂട്ടിയ കഴിഞ്ഞ ഫെബ്രുവരിയിലാണ് തൃണമൂല്‍ ബന്ധം ഉപേക്ഷിച്ചത്. 2014ല്‍ ഡാര്‍ജിലിങ് മണ്ഡലത്തില്‍ നിന്ന് ജനവിധി തേടിയിരുന്നെങ്കിലും പരാജയപ്പെട്ടിരുന്നു.