ലഖ്‌നൗ: ഉത്തര്‍പ്രദേശില്‍ 2013ല്‍ നടന്ന മുസഫര്‍ നഗര്‍ കലാപവുമായി ബന്ധപ്പെട്ട് യോഗി ആദിത്യനാഥ് സര്‍ക്കാര്‍ പിന്‍വലിക്കുന്ന കേസുകളില്‍ സംഘ്പരിവാര്‍ നേതാക്കള്‍ക്കെതിരായ വിദ്വേഷപ്രസംഗ കേസുകളും. സാധ്വി പ്രാചി ഉള്‍പ്പെടെ രണ്ട് ബി.ജെ.പി എം.പിമാരും മൂന്ന് എം.എല്‍.എമാര്‍ക്കുമെതിരായുള്ള വിദ്വേഷ പ്രസംഗ കേസുകളും ഇതില്‍ ഉള്‍പ്പെടും.
മുസഫര്‍ നഗര്‍ കലാപത്തിന് കാരണമായ മഹാ പഞ്ചായത്തില്‍ പങ്കെടുത്തുകൊണ്ട് കലാപത്തിന് ആഹ്വാനം ചെയ്തുവെന്നാണ് സാധ്വി പ്രാചി അടക്കമുള്ള നേതാക്കള്‍ക്കെതിരായ കേസ്. സാധ്വി പ്രാചി, ബി.ജെ.പി എം.പിമാരായ കുന്‍വാര്‍ ഭാരതേന്ദ്ര സിങ്, സഞ്ജീവ് ബല്യാണ്‍, എം.എല്‍.എമാരായ ഉമേഷ് മാലിക്, സംഗീത് സോം, സുരേഷ് റാന എന്നിവരാണ് മഹാപഞ്ചായത്തില്‍ പങ്കെടുത്ത് അക്രമത്തിന് ആഹ്വാനം ചെയ്തുകൊണ്ട് പ്രസംഗിച്ചത്.
മുസഫര്‍ നഗര്‍ കലാപവുമായി ബന്ധപ്പെട്ട് പിന്‍വലിക്കുന്ന 131 കേസുകളില്‍ 13 എണ്ണം കൊലപാതക കേസുകളാണ്. ജനുവരി 17ന് കേസിലെ നിലവിലെ സ്ഥിതി അന്വേഷിച്ച് നിയമകാര്യ മന്ത്രാലയം മുസഫര്‍ നഗര്‍ മജിസ്‌ട്രേറ്റിന് കത്തയച്ചിരുന്നു. കേസ് പിന്‍വലിക്കുന്നതിനെ കുറിച്ചുള്ള അഭിപ്രായവും പൊതുതാല്‍പര്യവും കത്തിലൂടെ ചോദിച്ചിരുന്നു. എന്നാല്‍ കത്തിന് ഇതുവരെ മജിസ്‌ട്രേറ്റ് മറുപടി നല്‍കിയിട്ടില്ല. ഇതിനിടയിലാണ് കേസ് പിന്‍വലിക്കാന്‍ യോഗി സര്‍ക്കാര്‍ തീരുമാനിച്ചത്. രാജ്യത്ത് വിദ്വേഷ പ്രസംഗം നടത്തിയതിന്റെ പേരില്‍ ഏറ്റവും കൂടുതല്‍ കേസുകളുള്ളത് ബി.ജെ.പി എം.പിമാരുടെയും എം.എല്‍.എമാരുടേയും പേരിലാണെന്ന റിപ്പോര്‍ട്ടുകള്‍ കഴിഞ്ഞ ദിവസം പുറത്തുവന്നിരുന്നു.