ലണ്ടന്‍: ചാംപ്യന്‍സ് ലീഗിലെ തകര്‍പ്പന്‍ വിജയത്തിന്റെ ആത്മവിശ്വാസത്തില്‍ സ്വന്തം തട്ടകത്തില്‍ കളിക്കാനിറങ്ങിയ ലിവര്‍പൂളിനെ സ്റ്റോക് സിറ്റി ഗോളടിക്കാനനുവദിക്കാതെ സമനിലയില്‍ കുരുക്കി. ഇംഗ്ലീഷ് പ്രീമിയര്‍ ലീഗിലെ ഹോം പോരാട്ടത്തിലാണ് ലിവര്‍പൂള്‍ ഗോള്‍രഹിത സമനിലയില്‍ കുരുങ്ങിയത്.
പ്രീമിയര്‍ ലീഗില്‍ നിന്ന് തരംതാഴ്ത്തല്‍ ഭീഷണി നേരിടുന്ന സ്റ്റോക് സിറ്റിയുമായുള്ള ഗോള്‍രഹിത സമനില ലിവര്‍പൂളിന്റെ മൂന്നാം സ്ഥാനത്തിനും ഇതോടെ ഭീഷണിയായി മാറി. 36 മത്സരങ്ങള്‍ കളിച്ച ലിവര്‍പൂള്‍ 72 പോയിന്റുമായി മൂന്നാം സ്ഥാനത്ത് നില്‍ക്കുന്നു.
നാലാമതുള്ള ടോട്ടനം 34 മത്സരങ്ങള്‍ മാത്രമാണ് പൂര്‍ത്തിയാക്കിയിട്ടുള്ളത്. ടോട്ടനം അടുത്ത രണ്ട് മത്സരങ്ങളും വിജയിച്ചാല്‍ ലിവര്‍പൂളിനെ പിന്തള്ളി അവര്‍ മൂന്നാം സ്ഥാനത്തേക്ക് കയറും.
മികച്ച ഫോമിലുള്ള മുഹമ്മദ് സലാഹ്, റോബര്‍ട്ടോ ഫിര്‍മിനോ എന്നിവര്‍ കളിക്കാനിറങ്ങിയപ്പോള്‍ സാദിയോ മാനെ കളത്തിലെത്തിയില്ല. പന്തടക്കത്തിലും പാസിങിലും ആക്രമണം നടത്തുന്നതിലുമെല്ലാം ലിവര്‍പൂള്‍ മുന്നില്‍ നിന്നെങ്കിലും കടുത്ത പ്രതിരോധം തീര്‍ത്ത് സ്റ്റോക് സിറ്റി നിന്നതോടെ റെഡ്‌സിന്റെ ഗോളടി മോഹങ്ങള്‍ ഫലം കാണാതെ പോയി. മത്സരത്തില്‍ 72 ശതമാനവും പന്ത് കൈവശം വച്ചത് ലിവര്‍പൂള്‍ തന്നെ.
മറ്റൊരു മത്സരത്തില്‍ മുന്‍ ചാംപ്യന്‍മാരായ ലെയസ്റ്റര്‍ സിറ്റിയെ സ്വന്തം തട്ടകത്തില്‍ ക്രിസ്റ്റല്‍ പാലസ് തുരത്തി. മറുപടിയില്ലാത്ത അഞ്ച് ഗോളുകള്‍ക്ക് അവര്‍ ലെയ്സ്റ്ററിനെ അട്ടിമറിച്ചു. എവര്‍ട്ടന്‍ 2-0ത്തിന് ഹഡ്ഡേഴ്‌സ്ഫീല്‍ഡിനേയും വെസ്റ്റ് ബ്രോംവിച് 1-0ത്തിന് ന്യൂകാസില്‍ യുനൈറ്റഡിനേയും സതാംപ്ടന്‍ 2-1ന് ബേണ്‍മൗത്തിനേയും പരാജയപ്പെടുത്തി.

 

വിജയം തുടര്‍ന്ന് ബാവേറിയന്‍സ്

മ്യൂണിക്ക്: ടീമില്‍ വന്‍ അഴിച്ചുപണി നടത്തി ഇറങ്ങിയ ബയേണ്‍ മ്യൂണിക്കിന് ജര്‍മന്‍ ബുണ്ടസ് ലീഗയില്‍ തകര്‍പ്പന്‍ ജയം. ഒന്നിനെതിരേ നാല് ഗോളുകള്‍ക്ക് അവര്‍ ഫ്രാങ്ക്ഫര്‍ടിനെ വീഴ്ത്തി.
റയല്‍ മാഡ്രിഡുമായുള്ള ചാംപ്യന്‍സ് ലീഗ് സെമിയുടെ ആദ്യ പാദത്തില്‍ 1-2ന് തോല്‍വി വഴങ്ങിയതിന്റെ ക്ഷീണത്തില്‍ സ്വന്തം തട്ടകത്തില്‍ വീണ്ടും കളിക്കാനിറങ്ങിയ ബയേണ്‍ മുന്‍നിര താരങ്ങള്‍ക്കൊക്കെ വിശ്രമം നല്‍കിയാണ് കളത്തിലെത്തിയത്. ആദ്യ പകുതിയില്‍ ഒന്നും രണ്ടാം പകുതിയില്‍ മൂന്നും ഗോളുകളാണ് ബയേണ്‍ എതിരാളിയുടെ വലയില്‍ നിക്ഷേപിച്ചത്.
ബയേണിനായി തന്റെ അരങ്ങേറ്റ മത്സരം കളിക്കാനിറങ്ങിയ യുവ താരം നിക്‌ലസ് ഡോര്‍ഷ് 43ാം മിനുട്ടില്‍ ടീമിന് ലീഡൊരുക്കി വരവറിയിച്ചു. രണ്ടാം പകുതിയില്‍ സാന്‍ഡ്രോ വാഗ്നര്‍, റഫീഞ്ഞ, സുലെ എന്നിവരും പട്ടിക തികച്ചു.
മറ്റ് മത്സരങ്ങളില്‍ ഹോഫെന്‍ഹെയിം 3-1ന് ഹന്നോവറിനേയും ഫ്രീബര്‍ഗ് 3-2ന് കൊളോണിനേയും ഹാംബര്‍ഗര്‍ 3-1ന് വോള്‍വ്‌സ്ബര്‍ഗിനേയും പരാജയപ്പെടുത്തി. ഹെര്‍ത്ത- ഓഗ്‌സ്ബര്‍ഗ് പോരാട്ടം 2-2നും ഷാല്‍കെ- ബൊറൂസിയ മോണ്‍ചെന്‍ഗ്ലെഡ്ബാച് മത്സരം 1-1നും സമനിലയില്‍ പിരിഞ്ഞു.

സെവിയ്യക്ക് തോല്‍വി

മാഡ്രിഡ്: സ്പാനിഷ് ലാ ലിഗയില്‍ കരുത്തരായ സെവിയ്യയെ ലെവാന്റെ അട്ടിമറിച്ചു. സ്വന്തം തട്ടകത്തില്‍ അവര്‍ ഒന്നിനെതിരേ രണ്ട് ഗോളുകള്‍ക്കാണ് സെവിയ്യയെ വീഴ്ത്തിയത്. മറ്റൊരു മത്സരത്തില്‍ റയല്‍ സോസിഡാഡ് അത്‌ലറ്റിക്ക് ബില്‍ബാവോയെ കീഴടക്കി. ഒന്നിനെതിരേ മൂന്ന് ഗോളുകള്‍ക്കാണ് റയല്‍ സോസിഡാഡിന്റെ വിജയം. എസ്പാന്യോള്‍- ലാസ് പല്‍മാസ് മത്സരം 1-1ന് സമനില.