മലപ്പുറം: ജില്ല പകര്‍ച്ചപ്പനി ഭീതിയില്‍. ഒരാഴ്ചക്കിടെ വിവിധ ആശുപത്രിയില്‍ ചികിത്സ തേടിയെത്തിയത് 5938 പേര്‍. ഇതില്‍ 70 പേര്‍ക്ക് ഡെങ്കിപ്പനി സാധ്യതയുള്ളതായാണ് ആരോഗ്യവകുപ്പിന്റെ റിപ്പോര്‍ട്ട്. കഴിഞ്ഞ ആറു മാസത്തിനിടയില്‍ 37 പേര്‍ക്കു മലമ്പനിയും റിപ്പോര്‍ട്ട് ചെയ്യപ്പെട്ടിട്ടുണ്ട്.  അതേ സമയം മുന്‍വര്‍ഷങ്ങളെ അപേക്ഷിച്ച് പനിബാധിതരുടെ എണ്ണം കുറവാണെന്നും കൂടുതല്‍ പേര്‍ക്കു പനിപടര്‍ന്നു പിടിക്കാതിരിക്കാനുള്ള മുന്‍കരുതലുകള്‍ എടുത്തിട്ടുണ്ടെന്നും ജില്ലാ മെഡിക്കല്‍ ഓഫീസര്‍ ഡോ.ഉമറുല്‍ ഫാറൂഖ് പറഞ്ഞു.
ഇടക്കിടെയുണ്ടായ വേനല്‍മഴയാണ് പകര്‍ച്ചവ്യാധികള്‍ പടരാന്‍ കാരണമായതെന്നാണ് ആരോഗ്യഅധികൃതരുടെ വിലയിരുത്തല്‍. സംസ്ഥാന തലത്തില്‍ തിരുവനന്തപുരത്തും മലപ്പുറത്തുമാണ് ഏറ്റവും കൂടുതല്‍ പനി റിപ്പോര്‍ട്ട് ചെയ്തിട്ടുള്ളത്. പനിയുള്‍പ്പടെയുള്ള മഴക്കാല പകര്‍ച്ചാ വ്യാധികള്‍ തടയാനായി മഴക്കാല പൂര്‍വ ശുചീകരണപ്രവര്‍ത്തനങ്ങള്‍ സജീവമക്കായിട്ടും പനി പിടിമുറുക്കുന്നത് ആശങ്കയിലാക്കിയിട്ടുണ്ട്. ആരോഗ്യവകുപ്പും ശുചിത്വമിഷനും ചേര്‍ന്ന് ജൂണ്‍ അഞ്ച് വരെ മഴക്കാല രോഗപ്രതിരോധ പ്രവര്‍ത്തനങ്ങള്‍ സജീവമായി നടത്തിയിരുന്നു.
കൊതുകു സാന്ദ്രത അപകടകരമായ നിലയില്‍ വര്‍ധിച്ചതാണ് പകര്‍ച്ച വ്യാധികള്‍ പടരുവാനുള്ള സാധ്യത വര്‍ധിപ്പിക്കുന്നത്. മാലിന്യവും മലിനജലവും കെട്ടിക്കിടക്കുന്ന തോടുകളിലും ഓടകളിലും കൊതുകുകള്‍ പെരുകുന്നത് ഇപ്പോഴും നിയന്ത്രിക്കാനായിട്ടില്ല. നഗരമധ്യത്തിലടക്കം ഇത്തരം മലിനമായ തോടുകള്‍ ഏറെയുണ്ട്. നഗരത്തിലെ തോടുകളിലേക്കും ഓടകളിലേക്കും വന്‍കിട ഹോട്ടലുകള്‍, വ്യാപാര സ്ഥാപനങ്ങള്‍ തുടങ്ങിയവയില്‍ നിന്ന് മാലിന്യം തള്ളുന്നതും പതിവാണ്. ജില്ലാ വെക്ടര്‍ കണ്‍ട്രോള്‍ യൂനിറ്റ് മലപ്പുറം, മഞ്ചേരി, കൊണ്ടോട്ടി, പൊന്നാനി, തിരൂര്‍ നഗരപ്രദേശങ്ങളില്‍ നടത്തിയ കൊതുകുസാന്ദ്രത പരിശോധനയില്‍ ഇരുപതോളം സ്ഥലങ്ങളില്‍ കൊതുകുമൂലമുള്ള രോഗ്യവ്യാപന സാധ്യത അപകടകരമായ രീതിയിലാണെന്ന് കണ്ടെത്തിയിരുന്നു. ഇവിടങ്ങളില്‍ കൊതുകുനശീകരണ പ്രവര്‍ത്തനങ്ങല്‍ ഊര്‍ജിതമാക്കി ഈ മാസം പത്തിന് വീണ്ടും പരിശോധന നടത്തുമെന്നും തുടര്‍ന്നും കൊതുകു സാന്ദ്രത കുറഞ്ഞില്ലെങ്കില്‍ തുടര്‍ നടപടികള്‍ സ്വീകരിക്കുമെന്നും ഡി.എം.ഒ സുപ്രഭാതത്തോട് പറഞ്ഞു.