അമ്പലപ്പുഴ: ശക്തമായ കാറ്റില്‍ വീട് പൂര്‍ണമായും തകര്‍ന്നു. കുട്ടികള്‍ ഉള്‍പ്പെടെയുളളവര്‍ അത്ഭുതകരമായി രക്ഷപെട്ടു. തകഴി പഞ്ചായത്ത് രണ്ടാംവാര്‍ഡ് പടഹാരം കരിങ്ങോട്ടുതറയില്‍ പരേതനായ യേശുദാസന്റെ വീടാണ് തകര്‍ന്നത്. ഇന്നലെ പുലര്‍ച്ചെ നാലോടെയായിരുന്നു അപകടം. അമ്മയും മൂന്നു മക്കളുമാണ് വീട്ടിലുണ്ടായിരുന്നത്. അപകടാവസ്ഥയിലായ വീട്ടില്‍നിന്ന് പുലര്‍ച്ചെതന്നെ ഇവര്‍ തൊട്ടടുത്ത ഷെഡിലേക്ക് മാറിയതിനാല്‍ അപകടം ഒഴിവായി. വീട് പൂര്‍ണമായും തകര്‍ന്നതോടെ ഈ കുടുംബം അന്തിയുറങ്ങാന്‍ ഇടമില്ലാതെ ദുരിതത്തിലായിരിക്കുകയാണ്. വില്ലേജ് ഓഫീസര്‍ സന്തോഷ്, ബ്ലോക്ക് പഞ്ചായത്തംഗം കെ പ്രകാശന്‍ എന്നിവര്‍ സംഭവസ്ഥലം സന്ദര്‍ശിച്ചു. ഏകദേശം മൂന്നു ലക്ഷം രൂപയുടെ നഷ്ടം കണക്കാക്കുന്നു.