തിരുവനന്തപുരം: കവിയൂര്‍ കേസില്‍ സി.ബി.ഐയുടെ നാലാം തുടരന്വേഷണ റിപ്പോര്‍ട്ടും കോടതി തള്ളി. വീണ്ടും അന്വേഷണം നടത്താന്‍ കോടതി നിര്‍ദ്ദേശിച്ചു. വഞ്ചിയൂര്‍ പ്രത്യേക സി.ബി.ഐ കോടതിയുടേതാണ് നടപടി. പെണ്‍കുട്ടിയെ പീഡിപ്പിച്ചതാരെന്ന് കണ്ടെത്താന്‍ കഴിഞ്ഞില്ലെന്നാണ് റിപ്പോര്‍ട്ട്. എന്നാല്‍ കുട്ടി ക്രൂരമായ പീഡനത്തിനിരയായെന്നും റിപ്പോര്‍ട്ടില്‍ പറയുന്നുണ്ട്. ലതാനായരാണ് കേസിലെ ഏകപ്രതി.

2004 സെപ്റ്റംബര്‍ 28നാണ് കവിയൂര്‍ ക്ഷേത്രത്തിന്റെ കിഴക്കേനടയില്‍ വാടകവീട്ടില്‍ ഗൃഹനാഥനെയും ഭാര്യയെയും രണ്ടു മക്കളെയും മരിച്ച നിലയില്‍ കണ്ടെത്തിയത്. ഇതില്‍ ഗൃഹനാഥനെ തൂങ്ങി മരിച്ചനിലയില്‍ കണ്ടെത്തിയിരുന്നു. മറ്റുള്ളവരെ കിടപ്പുമുറിയില്‍ മരിച്ചനിലയിലാണ് കാണപ്പെട്ടത്.

കിളിരൂര്‍ കേസിലെ മുഖ്യപ്രതിയായ ലതാനായര്‍ വീട്ടില്‍ ഒളിവില്‍ താമസിച്ചിരുന്നതായി പൊലിസ് കണ്ടെത്തിയിരുന്നു. ലതാനായരാണ് തങ്ങളുടെ മരണത്തിന് ഉത്തരവാദിയെന്ന് കാട്ടിയുള്ള ഗൃഹനാഥന്റെ ആത്മഹത്യാക്കുറിപ്പ് കണ്ടെടുത്തതോടെ കിളിരൂര്‍ കേസിനൊപ്പം കവിയൂര്‍ കേസും ഏറെ കോളിളക്കമുണ്ടാക്കി. ഇതോടെ 2006ല്‍ സര്‍ക്കാര്‍ ഈ കേസ് സി.ബി.ഐ.ക്കുവിട്ടു. മരണത്തിന് 72 മണിക്കൂര്‍ മുമ്പ് മൂത്ത മകള്‍ (14) പിഡീപ്പിക്കപ്പെട്ടതായി സി.ബി.ഐ. കണ്ടെത്തി.