കൊല്‍ക്കത്ത: സി.എ.എ അനുകൂല പരിപാടിയിലെ പ്രസംഗത്തിനിടെ മുസ് ലിം വിരുദ്ധ പരാമര്‍ശത്തെ എതിര്‍ത്ത വനിതാ അസിസ്റ്റന്റ് പ്രൊഫസര്‍ക്കു നേരെ സംഘ് പ്രവര്‍ത്തകരുടെ കയ്യേറ്റം. ജാദവ്പൂര്‍ സര്‍വ്വകലാ ശാല പ്രൊഫസര്‍ക്കു നേരെയാണ് സംഘ് പ്രവര്‍ത്തകരുടെ കയ്യേറ്റമുണ്ടായത്.

ജാദവ്പൂര്‍ സര്‍വ്വകലാശാലക്കു സമീപത്തെ ബസ് സ്റ്റാന്‍ഡിലായിരുന്നു പരിപാടി. ബ.ജം.പി ബംഗാള്‍ യൂനിറ്റ് നേതാക്കള്‍ ഉള്‍പെടെ സന്നിഹിതരായ പരിപാടിയില്‍ 50ല്‍ കുറവായിരുന്നു പങ്കാളിത്തം. വീട്ടിലേക്കു മടങ്ങുന്നതിനിടെ പരിപാടി ശ്രദ്ധയില്‍ പെട്ട ദോയീത മജുംദാര്‍ പൗരത്വ നിയമ ഭേദഗതിയെ അനുകൂലിച്ച് ഇവര്‍ എന്താണ് പറയുന്നതെന്ന് കേള്‍ക്കാന്‍ പോയതായിരുന്നു. തീവ്രഹിന്ദു ഗ്രൂപ്പായ ശ്യാമപ്രസാദ് മുഖര്‍ജി സ്മാരക സമിതിയാണ് പരിപാടി സംഘടിപ്പിച്ചിരുന്നത്. ബി.ജെ.പി ലോക്ഭാ എം.പി ശാന്തനു താക്കൂറും രാജ്യ സഭാ എം.പി സ്വപാന്‍ ദാസ്ഗുപ്തയും പരിപാടിയില്‍ പങ്കെടുത്തിരുന്നു.

സംസാരിച്ചു തുടങ്ങി നിമിഷങ്ങള്‍ കഴിഞ്ഞപ്പോഴേക്കും പ്രസംഗകന്‍ വിദ്വേഷ പരാമര്‍ശം ആരംഭിച്ചതായി ദോയീത മജുംദാര്‍ പറഞ്ഞു. സര്‍വ്വകലാശാലക്കു നേരെയായി അയാളുടെ ആക്രമണം. എല്ലാ തിന്മകളുടേയും വേരാണ് സര്‍വ്വകലാശാലയെന്ന് അയാള്‍ ആരോപിച്ചു. വിദ്യാര്‍ഥികളും അധ്യാപകരുമെല്ലാം എല്ലാ ദിവസവും അല്ലാഹു അക്ബര്‍ പറയും എന്നൊക്കെയായി പരാമര്‍ശം. കളവു പറയുകയാണെന്ന് ദോയിത ഉച്ചത്തില്‍ വിളിച്ചു പറഞ്ഞു. ഇതോടെ പരിപാടിയില്‍ വന്നവരെല്ലാം അവര്‍ക്ക് നേരെ തിരിയുകയായിരുന്നു.

തന്നെ അടിക്കുകയും പിടിച്ചു വലിക്കുകയും ചെയ്തതായി പ്രൊഫസര്‍ പറയുന്നു. തനിക്ക് നേരിട്ട ദുരനുഭവങ്ങള്‍ അവര്‍ ഫേസ്ബുക്കില്‍ പങ്കുവെച്ചിട്ടുണ്ട്.