ലഖ്‌നൗ: മലയാളിയായ മുന്‍ ഐ.എ.എസ് ഉദ്യോഗസ്ഥന്‍ കണ്ണന്‍ ഗോപിനാഥന്‍ കസ്റ്റഡിയില്‍. ഉത്തര്‍ പ്രദേശ് പൊലിസ് ആണ് അദ്ദേഹത്തെ കസ്റ്റഡിയിലെടുത്തത്. ഉത്തര്‍പ്രദേശിലേക്ക് കടക്കാന്‍ ഇനുവദിക്കില്ലെന്ന തീരുമാനത്തില്‍ അതിര്‍ത്തിയില്‍ വെച്ചു തന്നെ അദ്ദേഹത്തെ കസ്റ്റഡിയിലെടുക്കുകയായിരുന്നു. അദ്ദേഹം തന്നെയാണ് ട്വിറ്റര്‍ വഴി ഇക്കാര്യം പങ്കുവെച്ചത്.

പൊലിസ് മാന്യമായാണ് തന്നോട് പെരുമാറുന്നതെന്ന് അദ്ദേഹം ട്വിറ്ററില്‍ പങ്കുവെച്ചു. മുകളില്‍ നിന്നുള്ള ഉത്തരവ് മൂലമാണ് കസ്റ്റഡിയെന്നാണ് പൊലിസ് അദ്ദേഹത്തിന് നല്‍കി വിശദീകരണം. എവിടേക്കാണ് തന്നെ കൊണ്ടു പോവുന്നതെന്നറിയില്ലെന്നും അദ്ദേഹം പറയുന്നുണ്ട്. എന്നാല്‍ തന്നെ എത്തിച്ച ഹോട്ടലിന്റെ ചിത്രവും അദ്ദേഹം പങ്കുവെക്കുന്നു.

സി.എ.എ പ്രക്ഷോഭങ്ങള്‍ക്കു ശേഷം ഇന്റര്‍നെറ്റ് പോലും വിച്ഛേദിച്ച അവസ്ഥയാണ് യു.പിയില്‍. അതിനാല്‍ കസ്റ്റഡി സെബന്ധിച്ച വിവരങ്ങള്‍ എത്രത്തോളം പുറത്തെത്തുമെന്നാണ് ആശങ്ക.

പൗരത്വ നിയമത്തിനും ഭേദഗതിക്കുമെതിരെ ശക്തമായ നിലപാടെടുത്ത വ്യക്തിയാണ് കണ്ണന്‍ഗോപിനാഥന്‍. കശ്മീരില്‍ ആര്‍ട്ടിക്കിള്‍ 370 നീക്കം ചെയ്ത നടപടിയില്‍ പ്രതിഷേധിച്ചായിരുന്നു അദ്ദേഹം തന്റെ ഐ.എ.എസ് രാജി വെച്ചത്.