ദുബൈ: ദുബൈ എമിഗ്രേഷൻ (ജി.ഡി.ആർ.എഫ്.എ) 2024ലെ പങ്കാളികളെയും വിതരണക്കാരെയും ആദരിച്ചു. 'വിത് യു, വി എക്സൽ ഫോറം' എന്ന പേരിൽ ദുബൈ ഇന്റർകോണ്ടിനെന്റൽ ഹോട്ടലിലാണ് ചടങ്ങ് ഒരുക്കിയത്. ജി.ഡി.ആർ.എഫ്.എ ഡയരക്ടർ ജനറൽ ലഫ്റ്റനന്റ് ജനറൽ മുഹമ്മദ്‌ അഹ്‌മദ്‌ അൽ മർറി, വിവിധ അസിസ്റ്റന്റ് ഡയരക്ടർമാർ, സ്ഥാപന മേധാവികൾ പങ്കെടുത്തു.

യു.എ.ഇയുടെ വികസന യാത്രയ്ക്ക് പിന്തുണ നൽകുന്നതിൽ തന്ത്രപരമായ പങ്കാളിത്തത്തിന്റെ പ്രാധാന്യം ലഫ്റ്റനന്റ് ജനറൽ മുഹമ്മദ്‌ അഹ്‌മദ്‌ അൽ മർറി ഉദ്ഘാടന പ്രസംഗത്തിൽ പ്രത്യേകം ചൂണ്ടിക്കാട്ടി. പൊതുജനങ്ങൾക്ക് നൽകുന്ന സേവനങ്ങളുടെ ഗുണനിലവാരം മെച്ചപ്പെടുത്തുന്നതിന് സഹകരണം നിർണായകമാണെന്നും വിവിധ സ്ഥാപനങ്ങളുമായുള്ള സഹകരണം ശക്തിപ്പെടുത്തുന്നത് യു.എ.ഇയുടെ ദീർഘകാല മുന്നേറ്റ ലക്ഷ്യത്തെ പിന്തുണയ്ക്കുന്നതാണെന്നും അദ്ദേഹം പറഞ്ഞു.

ഡയരക്ടറേറ്റിന്റെ പങ്കാളികൾക്കും വിതരണക്കാർക്കും ലഫ്.ജനറൽ അൽ മർറി അഭിനന്ദനനവും പ്രശംസയും അറിയിച്ചു. ദുബൈയുടെ ആഗോള നില മെച്ചപ്പെടുത്തുന്നതിൽ സഹായകമായ രീതിയിലുള്ള സഹകരണവും അറിവ് പങ്കിടലും സംബന്ധിച്ച് വിശദീകരിച്ച അദ്ദേഹം, ആധികാരിക പങ്കാളിത്തം രൂപപ്പെടുത്തുന്നതിന്റെ ആവശ്യകത നിർദേശിക്കുകയും ചെയ്തു.

35 സ്ഥാപനങ്ങളെയും കമ്പനികളെയും പ്രമുഖ പങ്കാളികളെയും ചടങ്ങിൽ ആദരിച്ചു. തുടർന്ന്, യു.എ.ഇ ദേശീയ ഗാനം കാനൂൺ എന്ന പരമ്പരാഗത സംഗീതോപകരണത്തിൽ അവതരിപ്പിക്കുകയും ഡയരക്ടറേറ്റിന്റെ മികച്ച പങ്കാളിത്തം പ്രതിപാദിക്കുന്ന ഹ്രസ്വ ചിത്രം പ്രദർശിപ്പിക്കുകയും ചെയ്തു.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

Dubai Emigration pays tribute to individuals and organizations that have significantly contributed to the UAE's remarkable development journey, acknowledging their vital role in shaping the nation's future.