ന്യൂഡല്‍ഹി: പാര്‍ലമെന്റില്‍ റാഫേല്‍ അഴിമതി ആരോപണത്തില്‍ ധനകാര്യമന്ത്രി അരുണ്‍ ജെയ്റ്റ്‌ലി വിശദീകരണം നല്‍കുന്നതിനിടെ പ്രതിപക്ഷ എം.പിമാരുടെ പ്രതിഷേധം. കടലാസ് വിമാനം പറത്തിയാണ് അരുണ്‍ ജെയ്റ്റ്‌ലിയുടെ വിശദീകരണ സമയത്ത് പ്രതിഷേധിച്ചത്. കോണ്‍ഗ്രസ് എം.പിമാരായ സുഷ്മിതാ ദേവും രാജീവ് സതാവുമാണ് കടലാസ് വിമാനമുണ്ടാക്കി പ്രതിഷേധിച്ചത്.

എന്നാല്‍, ഇതു കണ്ട ലോക്‌സഭാ സ്പീക്കര്‍ സുമിത്ര മഹാജന്‍ ക്ഷുഭിതയാവുകയും എം.പിമാരെ ശകാരിക്കുകയും ചെയ്തു.

'നിങ്ങള്‍ കുട്ടികളാണോ? കുട്ടികാലത്ത് ചെയ്ത കാര്യങ്ങള്‍ തന്നെ ഇപ്പോഴും ആവര്‍ത്തിക്കുകയാണോ?' ഇതെന്താണ് നിങ്ങള്‍ ഈ പറത്തിവിടുന്നത്? നിങ്ങള്‍ തന്നെയല്ലേ ഈ കാര്യത്തില്‍ ചര്‍ച്ച ആവശ്യപ്പെട്ടത്? നിങ്ങള്‍ സംയമനത്തോടെ ഇത് കേട്ടേ തീരു. നിങ്ങള്‍ ഇത് സഹിച്ചേ പറ്റൂ. പറയൂ ജെയ്റ്റ്‌ലി ജി ' സുമിത്ര മഹാജന്‍ പറഞ്ഞു.ബഹളത്തെ കുറിച്ച് സ്പീക്കറോട് കേന്ദ്ര പ്രതിരോധ മന്ത്രി നിര്‍മ്മല സീതാരാമന്‍ പരാതി പറഞ്ഞു.