ന്യൂഡല്‍ഹി: ജെ.എന്‍.യുവില്‍ ഒരു പറ്റം ചിന്തകര്‍ വിഷം പടര്‍ത്താന്‍ ശ3മിക്കുകയാണെന്ന് ബി.ജെ.പി നേതാവ് ഉമാ ഭാരതി. ഡല്‍ഹിയിലെ ജെ.എന്‍.യുവില്‍ ഞായറാഴ്ച്ച രാത്രി മുഖം മൂടി ധരിച്ചെത്തിയ സംഘം വിദ്യാര്‍ത്ഥികളേയും അധ്യാപകരേയും അക്രമിച്ച സംഭവത്തിലാണ് ബി.ജെ.പി നേതാവിന്റെ വിവാദ പരാമര്‍ശം.

'ഇവിടെ പ്രത്യേകഗണത്തില്‍ ഉള്‍പ്പെടുന്ന പാമ്പുകളുണ്ട്. എണ്ണത്തില്‍ വളരെ കുറവായിരിക്കും. പക്ഷെ കൊടിയ വിഷയമുള്ളതാണ്. രാജ്യത്ത് ഒരു സംഘം ചിന്തകരുണ്ട്. അവരും എണ്ണത്തില്‍ കുറവാണ്. പക്ഷെ വിഷമുള്ളവരാണ്. അന്തരീക്ഷത്തില്‍ വിഷം കലര്‍ത്താനാണ് അവരുടെ ശ്രമം. ചിലതൊക്കെ ശരിയാക്കാനുണ്ട്. നമ്മള്‍ അവരെയൊക്കെ ശരിയാക്കുകയും ചെയ്യും'- ഉമാ ഭാരതി പറഞ്ഞു.

ഫീസ് വര്‍ധനയ്‌ക്കെതിരെ പ്രതിഷേധിക്കുന്ന വിദ്യാര്‍ത്ഥികള്‍ക്ക് നേരെയുണ്ടായ ആക്രമണത്തില്‍ വിദ്യാര്‍ത്ഥി യൂണിയന്‍ പ്രസിഡന്റ് ഉള്‍പ്പെടെ നിരവധി പേര്‍ക്ക് മാരകമായി പരിക്കേറ്റിരുന്നു. ഹോസ്റ്റലുകളില്‍ വരെ കയറിച്ചെന്ന് വിദ്യാര്‍ത്ഥികളെ മാരകായുധങ്ങള്‍ കൊണ്ട് ആക്രമിക്കുകയായിരുന്നു.

ആക്രമണത്തിന്റെ ഉത്തരവാദിത്തം ഏറ്റെടുത്ത് ഹിന്ദു രക്ഷാദള്‍ രംഗത്തെത്തിയിരുന്നു. സംഭവവുമായി ബന്ധപ്പെട്ട ചിലരെ തിരിച്ചറിയുകയും ചെയ്തിരുന്നു. എന്നാല്‍ 72 മണിക്കൂര്‍ പിന്നിട്ടുട്ടും പൊലിസ് ഒരു അറസ്റ്റ് പോലും രേഖപ്പെടുത്തിയിട്ടില്ല.

സംഭവത്തില്‍ വൈസ് ചാന്‍സലര്‍ ജഗദീഷ് കുമാറിനെതിരെയും വലിയ പ്രതിഷേധമുയര്‍ന്നിരുന്നു. വൈസ് ചാന്‍സലര്‍ രാജി വെക്കണമെന്നാവശ്യപ്പെട്ടുകൊണ്ട് നിരവധി പേരാണ് രംഗത്തെത്തിയത്. എന്നാല്‍ കഴിഞ്ഞതെല്ലാം മറക്കാമെന്നും വിദ്യാര്‍ത്ഥികളോട് ക്യാമ്പസിലേക്ക് തിരിച്ചെത്തണമെന്നുമായിരുന്നു ജഗദീഷ് കുമാറിന്റെ പ്രതികരണം.