തെല്‍വ് അവീവ്: ഒന്നാം ഘട്ട വെടിനിര്‍ത്തല്‍ അവസാനിച്ചതിന് പിന്നാലെ ഗസ്സയിലേക്കുള്ള മുഴുവന്‍ മാനുഷിക സഹായങ്ങളും തടഞ്ഞ് ഇസ്‌റാഈല്‍. ഗസ്സയിലേക്കുള്ള മുഴുവന്‍ മാനുഷിക സഹായവും തടഞ്ഞ് മുനമ്പില്‍ പുതിയ ഉപരോധം തീര്‍ക്കുമെന്ന ഭീഷണി മുഴക്കുകയാണ് ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു. ഗസ്സ വെടിനിര്‍ത്തലുമായി ബന്ധപ്പെട്ട തുടര്‍ ചര്‍ച്ചാ സാധ്യതകള്‍ക്ക് മങ്ങലേല്‍പിക്കുന്നതാണ് ഇസ്‌റാഈലിന്റെ ഈ ഉപരോധ നീക്കം. 

അതേസമയം, റമദാനില്‍ ഗസ്സയില്‍ ആക്രമണം നടത്തരുതെന്ന യു.എസ് നിര്‍ദ്ദേശം ഇസ്‌റാഈല്‍ അംഗീകരിച്ചിരുന്നു. വെടിനിര്‍ത്തല്‍ കരാര്‍ കരാറിന്റെ ഒന്നാം ഘട്ടം അവസാനിക്കുകയും തുടര്‍ചര്‍ച്ചകള്‍ മുന്നോട്ട് പോവാതിരിക്കുകയും ചെയ്തിരുന്ന സാഹചര്യത്തില്‍ താല്‍ക്കാലികാശ്വാസമായാണ് ഗസ്സയില്‍ റമദാനില്‍ ആക്രമണം ഉണ്ടാവില്ലെന്ന് ഇസ്‌റാഈല്‍ അറിയിപ്പെത്തിയത്. എന്നാല്‍ അതിനെ ഇല്ലാതാക്കുന്നതാണ് ഇസ്‌റാഈലിന്റെ പുതിയ നീക്കം. 

ഗസ്സ വെടിനിര്‍ത്തല്‍ കരാറിന്റെ ഒന്നാംഘട്ടം അവസാനിക്കുകയും ഈജിപ്തില്‍ നടന്ന രണ്ടാം ഘട്ട വെടിനിര്‍ത്തല്‍ ചര്‍ച്ച തീരുമാനമാകാതെ പിരിയുകയും ചെയ്ത സാഹചര്യത്തിലാണ് അമേരിക്ക പുതിയ നിര്‍ദേശം മുന്നോട്ടുവെച്ചത്. 

അതേസമയം, ഹമാസിന്റെ പക്കലുള്ള ബന്ദികളില്‍ പകുതി പേരെ ഇപ്പോള്‍ കൈമാറണമെന്ന ഒരാവശ്യം ഇസ്‌റാഈല്‍ മുന്നോട്ട് വച്ചിരുന്നു. എന്നാല്‍ ഇസ്‌റാഈലിന്റെ ഈ ആവശ്യം ഹമാസ് അംഗീകരിച്ചിട്ടില്ല. 

ഗസ്സയില്‍ ഇത് മരണം പെയ്യാത്ത പുണ്യമാസം;  റമദാനില്‍ ആക്രമണം വേണ്ടെന്ന യു.എസ് നിര്‍ദേശം അംഗീകരിച്ച് ഇസ്‌റാഈല്‍ 

കഴിഞ്ഞ ദിവസമാണ് ഗസ്സ വെടിനിര്‍ത്തല്‍ കരാറിന്റെ ഒന്നാം ഘട്ടവെടിനിര്‍ത്തല്‍ സമയ പരിധി  അവസാനിച്ചത്.അതേസമയം, ഈജിപ്തില്‍ നടന്ന മധ്യസ്ഥ ചര്‍ച്ചകളില്‍ തീരുമാനമാകാത്തത് മൂലം ഇസ്‌റാഈല്‍ സംഘം കൈറോയില്‍ നിന്ന് മടങ്ങിയിരുന്നു. പിന്നീട് യു.എസ് ഇടപെടലിനെ തുടര്‍ന്ന് ഇസ്‌റാഈല്‍ ചര്‍ച്ചക്ക് തയാറായി. എന്നാല്‍ ആദ്യ ധാരണകളില്‍ നിന്ന് പിന്നോട്ടുപോകാനുള്ള ശ്രമം അംഗീകരിക്കില്ലെന്ന് ഹമാസ് നിലപാടെടുത്തു. 

പിന്നാട് രണ്ടാം ഘട്ടത്തില്‍ ഫിലഡല്‍ഫി ഇടനാഴിയില്‍ നിന്നടക്കം ഗസ്സയില്‍ നിന്നുള്ള  സൈന്യത്തിന്റെ സമ്പൂര്‍ണ്ണ പിന്‍മാറ്റം എന്ന വ്യവസ്ഥഅംഗീകരിക്കാനാവില്ലെന്ന നിലപാടുമായി ഇസ്‌റാഈല്‍ മുന്നോട്ടു പോയതും കരാര്‍ അനിശ്ചിതത്വത്തിലാക്കി. വിഷയത്തില്‍ ഇസ്‌റാഈല്‍  ഇന്ന് രാത്രി അടിയന്തര സുരക്ഷാ യോഗം ചേരും. 

അതിനിടെ വെസ്റ്റ് ബാങ്കില്‍ ഇസ്‌റാഈല്‍ അതിക്രമം തുടരുകയാണ്. കഴിഞ്ഞ ദിവസവും അഭയാര്‍ഥി ക്യാംപിന് നേരെ ആക്രമണം നടത്തിയിരുന്നു. അവിടുത്തെ വീടുകള്‍ ബുള്‍ഡോസര്‍ ഉപയോഗിച്ച് തകര്‍ക്കുകയും ചെയ്തിരുന്നു.