കൊച്ചി: എറണാകുളം കാക്കനാട് തെങ്ങോട് സര്‍ക്കാര്‍ സ്‌കൂളിലെ പത്താംക്ലാസുകാരിക്കുനേരെ നായ്ക്കുരണയെറിഞ്ഞ സംഭവത്തില്‍ പൊലീസ് കേസെടുത്തു. ജുവനൈല്‍ നിയമപ്രകാരം സഹപാഠികളായ 5 വിദ്യാര്‍ഥിനികള്‍ക്കെതിരെയും ബി.എന്‍.എസ് നിയമ പ്രകാരം സ്‌കൂളിലെ രണ്ട് അധ്യാപകര്‍ക്കെതിരെയുമാണ് കേസ്. കാക്കനാട് ഇന്‍ഫോപാര്‍ക്ക് പൊലീസാണ് കേസെടുത്തത്.

നേരത്തെ പൊലിസ് കേസ് അന്വേഷിക്കാന്‍ മടിച്ചതിനെ തുടര്‍ന്ന് സിറ്റി പൊലീസ് കമ്മീഷണര്‍ക്കും വിദ്യാഭ്യാസ ഡെപ്യൂട്ടി ഡയറക്ടര്‍ക്കും അമ്മ പരാതി നല്‍കുകയായിരുന്നു
 
കാക്കനാട് തെങ്ങോട് ഗവ. ഹൈസ്‌കൂളില്‍ ഫെബ്രുവരി മൂന്നിനാണ് സംഭവം. മറ്റൊരു പെണ്‍കുട്ടി കൊണ്ടുവന്ന നായ്ക്കുരണ വിദ്യാര്‍ഥികള്‍ എറിഞ്ഞു കളിച്ചപ്പോള്‍ പെണ്‍കുട്ടിയുടെ ദേഹത്ത് വീണതാണെന്നാണ് സ്‌കൂള്‍ അധികൃതര്‍ വിശദീകരിച്ചത്. എന്നാല്‍, മറ്റൊരു പെണ്‍കുട്ടിക്ക് നേരെ പ്രയോഗിക്കാന്‍ കൊണ്ടുവന്ന പൊടിയാണ് തന്റെ ദേഹത്ത് ഇട്ടതെന്നും പെണ്‍കുട്ടി പറഞ്ഞു. തൊട്ടു പിന്നാലെ ചൊറിച്ചില്‍ സഹിക്കാന്‍ വയ്യാതെ കടുത്ത പ്രയാസത്തിലായെന്നും അധ്യാപകരോട് പരാതി പറഞ്ഞപ്പോള്‍ പിന്തുണ നല്‍കാതെ ക്ലാസിലിരിക്കാന്‍ നിര്‍ബന്ധിച്ചുവെന്നും പെണ്‍കുട്ടി അന്വേഷണ ഉദ്യോഗസ്ഥരോട് വെളിപ്പെടുത്തി.

സംഭവത്തിന് പിന്നാലെ കാക്കനാട്ടെ സ്വകാര്യ ആശുപത്രിയില്‍ ചികിത്സയിലായിരുന്നു പെണ്‍കുട്ടി. മോഡല്‍ എക്സാം പോലും കുട്ടിക്ക് എഴുതാനായില്ല. എസ്.എസ്.എല്‍.സി പരീക്ഷ പൂര്‍ത്തിയാല്‍ ഉടന്‍ തുടര്‍ നടപടികളിലേക്ക് പൊലീസ് കടക്കും. പെണ്‍കുട്ടിക്ക് പരീക്ഷ എഴുതാന്‍ വേണ്ട സൗകര്യങ്ങള്‍ ചെയ്തുകൊടുത്തതായി സ്‌കൂള്‍ അധികൃതര്‍ അറിയിച്ചു.