വൈത്തിരി: അടിസ്ഥാന സൗകര്യങ്ങളുടെ അഭാവവും ആവശ്യത്തിന് ഡോക്ടര്‍മാരില്ലാത്തതും താലൂക്ക് ആശുപത്രിയില്‍ ചികിത്സ തേടുന്നവരെ ദുരിതത്തിലാക്കുന്നു.
മാസങ്ങള്‍ മുമ്പ് സ്ഥാപിച്ച വാട്ടര്‍ പ്യൂരിഫയര്‍ തകരാറിലായത് വാര്‍ഡുകളില്‍ ശുദ്ധജല ലഭ്യതയെ ബാധിച്ചു. വാര്‍ഡുകളിലെ ശുചിമുറികളില്‍ ബള്‍ബുകള്‍ തെളിയാത്തത് രോഗികള്‍ക്കും കൂട്ടിരിപ്പുകാര്‍ക്കും പ്രയാസം സൃഷ്ടിക്കുകയാണ്. നാളുകളായി ആശുപത്രിയിലെ മാലിന്യ സംസ്‌കരണ സംവിധാനം അവതാളത്തിലാണ്. ഡോക്ടര്‍മാരുടെ കുറവും ആശുപത്രി പ്രവര്‍ത്തനത്തെ ബാധിക്കുകയാണ്. ആശുപത്രി സൂപ്രണ്ടിന്റെ തസ്തിക 2017 മുതല്‍ ഒഴിഞ്ഞുകിടക്കുകയാണ്. രണ്ടു ഗൈനക്കോളജിസ്റ്റുകള്‍ വേണ്ടിടത്ത് ഒരാളാണുള്ളത്. ദിവസവും ആദിവാസികളും തോട്ടം തൊഴിലാളികളടക്കം നൂറുകണക്കിനാളുകള്‍ ചികിത്സയ്‌ക്കെത്തുന്നതാണ് താലൂക്ക് ആശുപത്രി.