പെര്‍ള: സ്വത്ത് തര്‍ക്കത്തെ തുടര്‍ന്നുണ്ടായ സംഘര്‍ഷവുമായി ബന്ധപ്പെട്ട് രണ്ടു പരാതികളിലായി പത്തു പേര്‍ക്കെതിരെ ബദിയടുക്ക പൊലിസ് നരഹത്യാശ്രമത്തിന് കേസെടുത്തു. പെര്‍ള ഇടിയടുക്കയിലെ ഇബ്രാഹിം ഖലീല്‍ (26), അബ്ദുല്‍ അസീസ് (32) എന്നിവരെ അക്രമിച്ചതിനു ഹക്കീം, സിദ്ദീഖ്, ഹസൈനാര്‍ ഹാജി, റഫീഖ്, നബീല്‍ എന്നിവര്‍ക്കെതിരേയും, എന്‍മകജെ പഞ്ചായത്തംഗം സിദ്ദീഖിനെ മര്‍ദ്ദിച്ചതിനു ഖലീല്‍, ഫൈസല്‍, അബൂബക്കര്‍, അസീസ്, ജമാല്‍ എന്നിവര്‍ക്കെതിരെയുമാണ് കേസ്. കഴിഞ്ഞ ദിവസം രാത്രിയിലായിരുന്നു കേസിനാസ്പദമായ സംഭവം.
സ്വത്ത് വീതം വെക്കുന്നതിനെ സംബന്ധിച്ചു ചര്‍ച്ച നടക്കുന്നതിനിടയില്‍ സിദ്ദിഖ് കത്തികൊണ്ടു വെട്ടുകയായിരുന്നുവെന്നും തടയാന്‍ ചെന്ന അബ്ദുള്‍ അസീസിനും വെട്ടേറ്റുവെന്ന് ആശുപത്രിയില്‍ ചികിത്സയില്‍ കഴിയുന്ന ഖലീല്‍ പറഞ്ഞു. അതേ സമയം സ്വത്ത് സംബന്ധമായ ചര്‍ച്ചക്കിടയില്‍ അസീസ് തന്നെ കുത്താന്‍ ശ്രമിച്ചുവെന്നാണ് സിദ്ദിഖ് പറയുന്നത് . ഖലീലും അബ്ദുള്‍ അസീസും മംഗളുരുവിലെ സ്വകാര്യ ആശുപത്രിയിലും സിദ്ദിഖ് കാസര്‍കോട് സ്വകാര്യ ആശുപത്രിയിലും ചികിത്സയിലാണ്.