കല്‍പ്പറ്റ: സംസ്ഥാനത്തെ സര്‍ക്കാര്‍ കോളജുകളില്‍ മാധ്യമ പഠന വിഭാഗത്തില്‍ ആവശ്യമായ തസ്തിക സൃഷ്ടിക്കാന്‍ നടപടികളില്ല. ഇത് വിദ്യാര്‍ഥികള്‍ക്കും ഉദ്യോഗാര്‍ഥികള്‍ക്കും തിരിച്ചടിയാകുകയാണ്. സംസ്ഥാനത്തെ 18 കോളജുകളില്‍ മാധ്യമ പഠനം (മാസ് കമ്മ്യൂണിക്കേഷന്‍ ആന്‍ഡ് ജേണലിസം) മുഖ്യവിഷയമായും കോംപ്ലിമെന്ററിയായും സബ്‌സിഡറിയായും നിലവില്‍ പഠിപ്പിക്കുന്നുണ്ട്. എന്നാല്‍ ഈ വിഷയത്തിനായി 2014ല്‍ നടത്തിയ നാലു നിയമനങ്ങള്‍ മാത്രമാണ് ഇതുവരെ നടന്നത്. നിലവില്‍ കല്‍പ്പറ്റ എന്‍.എം.എസ്.എം ഗവ.കോളജിലെ ഒരു പോസ്റ്റിലേക്ക് പി.എസ്.സി പരീക്ഷയും അഭിമുഖവും പൂര്‍ത്തിയാക്കി റാങ്ക് ലിസ്റ്റ് തയാറാക്കിയെങ്കിലും ഇതുവരെ നിയമനം നടന്നിട്ടില്ല.
ആഴ്ചയില്‍ ഒന്‍പത് മണിക്കൂറിലധികം ഒരു വിഷയത്തിന് അനുവദിക്കുന്നുണ്ടെങ്കില്‍ ഒഴിവുകള്‍ റിപ്പോര്‍ട്ട് ചെയ്ത് തസ്തികകള്‍ അനുവദിക്കണമെന്ന ഉന്നത വിദ്യാഭ്യാസ വകുപ്പിന്റെ ഉത്തരവുണ്ടായിരിക്കെ, വര്‍ഷങ്ങളായി താല്‍ക്കാലിക അധ്യാപകരെ നിയമിച്ചാണ് കോളജുകളില്‍ അധ്യയനം നടത്തുന്നത്.
ആഴ്ചയില്‍ 72 മണിക്കൂറാണ് കല്‍പ്പറ്റ എന്‍.എം.എസ്.എം ഗവ.കോളജില്‍ വിഷയത്തിന് അനുവദിച്ചിരിക്കുന്നത്. ഇവിടെ രണ്ടുസ്ഥിര നിയമനം മാത്രമാണ് നടന്നിട്ടുള്ളത്. ബിരുദാനന്തര ബിരുദ കോഴ്‌സുമുള്ള കോളജില്‍ ഏഴ് തസ്തികകള്‍ ആവശ്യമായ സാഹചര്യത്തിലാണിത്. നിലവിലെ റാങ്ക് ലിസ്റ്റില്‍നിന്ന് ഒരു നിയമനം നടന്നാലും നാല് തസ്തികകള്‍ ഇവിടെ ഒഴിഞ്ഞുകിടക്കും.
ആഴ്ചയില്‍ 12 മണിക്കൂര്‍ വിഷയത്തിന് അനുവദിക്കുന്ന അഞ്ചു കോളജുകളും 16 മണിക്കൂര്‍ അനുവദിക്കുന്ന ഒരു കോളജും ഒന്‍പത് മണിക്കൂര്‍ അനുവദിക്കുന്ന ഒരു കോളജും ആറ് മണിക്കൂര്‍ വീതം അനുവദിക്കുന്ന പത്ത് കോളജുകളുമാണുള്ളത്. അഞ്ചിലധികം തസ്തികകള്‍ സൃഷ്ടിച്ച് നിയമനം നടത്തണമെന്നിരിക്കെ, വര്‍ഷങ്ങളായി ബന്ധപ്പെട്ടവര്‍ ഈ ആവശ്യം അവഗണിക്കുകയാണെന്ന ആക്ഷേപമാണ് ഉയരുന്നത്. നിയമനം നടക്കാത്തത് റാങ്ക് ലിസ്റ്റില്‍ ഉള്‍പ്പെട്ട ഉദ്യോഗാര്‍ഥികളുടെ അവസരം നഷ്ടപ്പെടുത്തുമെന്ന ആശങ്കയും നിലനില്‍ക്കുന്നുണ്ട്. തസ്തികകള്‍ അനുവദിക്കുന്നതിനും സര്‍ക്കാര്‍ കോളജുകളില്‍ മാധ്യമ പഠന കോഴ്‌സുകള്‍ തുടങ്ങുന്നത് സംബന്ധിച്ചും ഉന്നത വിദ്യാഭ്യാസ വകുപ്പ് മന്ത്രിക്ക് പരാതികളും നിവേദനങ്ങളും നല്‍കിയിട്ടും തുടര്‍നടപടികളില്ലെന്ന ആക്ഷേപവും ഉയരുന്നുണ്ട്.