മലപ്പുറം: കേരളത്തിന്റെ ചുമതലയുള്ള എ.ഐ.സി.സി ജന. സെക്രട്ടറി മുകുള്‍ വാസ്‌നിക് ഇന്നലെ പാണക്കാട്ടെത്തി സയ്യിദ് ഹൈദരലി ശിഹാബ് തങ്ങളെ സന്ദര്‍ശിച്ചു. ആസന്നമായ പാര്‍ലമെന്റ് തെരഞ്ഞെടുപ്പിന്റെ മുന്നൊരുക്കങ്ങളുടെ ഭാഗമായിട്ടായിരുന്നു കൂടിക്കാഴ്ച.
രാവിലെ 9.30 ന് പാണക്കാട്ടെത്തിയ മുകുള്‍ വാസ്‌നിക് മുസ്‌ലിംലീഗ് ദേശീയ രാഷ്ട്രീയ കാര്യ സമിതി അധ്യക്ഷന്‍ കൂടിയായ സയ്യിദ് ഹൈദരലി തങ്ങള്‍, ദേശീയ ജന. സെക്രട്ടറി പി.കെ കുഞ്ഞാലിക്കുട്ടി എം.പി, സംസ്ഥാന ജന. സെക്രട്ടറി കെ.പി.എ മജീദ് എന്നിവരുമായി അരമണിക്കൂര്‍ തെരഞ്ഞെടുപ്പുമായി ബന്ധപ്പെട്ട് ചര്‍ച്ച നടത്തി. സംസ്ഥാന വൈസ് പ്രസിഡന്റ് സി.പി ബാവ ഹാജി, അഡ്വ. യു.എ ലത്തീഫ് എന്നിവരും സന്നിഹിതരായിരുന്നു.
ഡി.സി.സി പ്രസിഡന്റ് വി.വി പ്രകാശ്, പി.ടി അജയ്‌മോഹന്‍, കെ.പി അബ്ദുല്‍ മജീദ്, കെ.പി അനില്‍കുമാര്‍, മണക്കാട് സുരേഷ്, അഡ്വ.അനില്‍ ബോസ്, ഇ. മുഹമ്മദ് കുഞ്ഞി, സക്കീര്‍ പുല്ലാര, എം.കെ മുഹ്‌സിന്‍ എന്നിവരോടൊപ്പം എത്തിയ മുകുള്‍ വാസ്‌നിക് പത്ത് മണിയോടെ മലപ്പുറത്തേക്ക് മടങ്ങി. പിന്നീട് മലപ്പുറം മുനിസിപ്പല്‍ ബസ്റ്റാന്‍ഡ് ഓഡിറ്റോറിയത്തില്‍ നടന്ന കോണ്‍ഗ്രസ് നേതൃസംഗമത്തില്‍ പങ്കെടുത്ത ശേഷം പാലക്കാട്ടേക്ക് മടങ്ങി.