കിളിമാനൂര്‍: നട്ട് പരിപാലിച്ച് കുല വന്ന ആയിരത്തോളം വാഴകള്‍ കടുത്ത വേനല്‍ മൂലം നശിച്ചു.കര്‍ഷകന്‍ ദുരിതക്കയത്തില്‍. പഴയകുന്നുമ്മേല്‍ കൃഷി ഭവന് കീഴിലെ കിളിമാനൂര്‍ പാപ്പാല അലവക്കോട് ചരുവിള പുത്തന്‍ വീട്ടില്‍ കൃഷ്ണന്‍ കുട്ടി നായരു(59)ടെ വാഴകളാണ് നശിച്ചത് .ഒന്നര ലക്ഷത്തോളം രൂപയുടെ നഷ്ടം സംഭവിച്ചതായി കൃഷ്ണന്‍ കുട്ടി പറയുന്നു. ബാങ്കില്‍ നിന്നും വായ്പയെടുത്തും മറ്റുമാണ് കൃഷിയിറക്കിയത്.ഇപ്പോഴുണ്ടായ നഷ്ടത്തില്‍ എന്തു ചെയ്യണമെന്നറിയാതെ പകച്ചു നില്‍ക്കുകയാണ് ഇദ്ദേഹം.
വളരെ കാലമായി കാര്‍ഷിക രംഗത്തുള്ള കൃഷ്ണന്‍കുട്ടി കഴിഞ്ഞ ഓണത്തിന് സര്‍ക്കാരിന്റെ അഭ്യര്‍ഥന മാനിച്ച് കൃഷിയിറക്കി വലിയതോതില്‍ വിവിധ തരം പച്ചക്കറികള്‍ വിപണിയില്‍ എത്തിച്ചിരുന്നു. പാടവലമാണ് അന്ന് വിളയിച്ചത്. സ്വന്തമായി ഭൂമി ഇല്ലാത്ത ഇദ്ദേഹം ഒന്നര ഏക്കറോളം പാടം പാട്ടത്തിനെടുത്തതാണ് കൃഷിയിറക്കിയത്.കൃഷി ഓഫിസില്‍ പരാതി നല്‍കിയിട്ടുണ്ട്. അനുഭാവ പൂര്‍വമായ നടപടിയുണ്ടായില്ലെങ്കില്‍ ജീവിതം തന്നെ മുന്നോട്ടു കൊണ്ടുപോകാന്‍ കഴിയാത്ത സാഹചര്യമാണെന്ന് ഈ കര്‍ഷകന്‍ പറയുന്നു.