കുമളി: പെട്ടിക്കട കുത്തിത്തുറന്ന് സിഗരറ്റ് പാക്കറ്റുകള്‍ മോഷ്ടിച്ച സംഭവത്തില്‍ പ്രായപൂര്‍ത്തിയാകാത്ത വിദ്യാര്‍ഥി ഉള്‍പ്പെടെ രണ്ട് പേര്‍ പിടിയിലായി. കുമളി അമരാവതി രാജീവ്ഗാന്ധി കോളനി കുഴിവിളയില്‍ അനൂപ് (18),പതിനേഴുകാരനായ സുഹൃത്ത്  എന്നിവരാണ് പിടിയിലായത്.
ഇന്നലെ രാവിലെ ഏഴ് മണിയോടെ കുമളി ടൗണിന് സമീപം വലിയകണ്ടത്തുള്ള കച്ചവട സ്ഥാപനത്തിനു മുമ്പില്‍ സംശയാസ്പദമായ സാഹചര്യത്തില്‍ കണ്ട ഇരുവരേയും കുമളി എസ്.ഐ ടി ഡി പ്രജീഷ്  ചോദ്യം ചെയ്യുകയായിരുന്നു. ഇതിനിടെ ഇവരുടെ കൈവശമുണ്ടായിരുന്ന സഞ്ചി പരിശോധിച്ചപ്പോഴാണ് 40 പായ്ക്കറ്റ് സിഗരറ്റും 29 പാക്കറ്റ് നിജാം പാക്കും പ്രവര്‍ത്തനരഹിതമായ ഏഴ് മൊബൈല്‍ ഫോണുകളും സ്‌ക്രൂെ്രെഡവറും തകര്‍ന്ന പൂട്ടും കണ്ടെത്തിയത്. ഇവരെ സ്‌റ്റേഷനില്‍ എത്തിച്ച് ചോദ്യം ചെയ്തപ്പോഴാണ് മോഷണ വിവരം പുറത്തായത്.
ഇന്നലെ പുലര്‍ച്ചെ ഒന്നാംമൈല്‍ ടൗണില്‍ പ്രര്‍ത്തിക്കുന്ന കിഴക്കനേത് വീട്ടില്‍ ജോര്‍ജിന്റെ കടയുടെ പൂട്ട് പൊളിച്ചാണ് ഇവര്‍ മോഷണം നടത്തിയത്.
പൊലിസ് അറിയിച്ചതിനെ തുടര്‍ന്ന് ജോര്‍ജെത്തി പരാതി നല്‍കി. അനുപിനെ പീരുമേട് കോടതിയിലും പ്രായപൂര്‍ത്തിയാകാത്തയാളെ തൊടുപുഴ ജുവൈനല്‍ കോടതിയിലും ഹാജരാക്കി.