ന്യൂഡല്‍ഹി: ഷൂട്ടര്‍ അഭിനവ് ബിന്ദ്ര റിയോ ഒളിംപിക്‌സില്‍ ഇന്ത്യന്‍ പതാകയേന്തും. ഓഗസ്റ്റ് അഞ്ചിന് ആരംഭിക്കുന്ന ഒളിംപിക്‌സിന്റെ ഉദ്ഘാടന ചടങ്ങിലെ മാര്‍ച്ച് പാസ്റ്റിലാണ് താരം ഇന്ത്യന്‍ പതാകയേന്തുക. ഇന്ത്യന്‍ ഒളിംപിക് അസോസിയേഷനാണ് ഇക്കാര്യം വ്യക്തമാക്കിയത്.
ബിന്ദ്രയുടെ അഞ്ചാമത്തെ ഒളിംപിക്‌സാണിത്. ഇതുകൂടി പരിഗണിച്ചാണ് അസോസിയേഷന്‍ തീരുമാനമെടുത്തത്. ലണ്ടന്‍ ഒളിംപിക്‌സിലും താരത്തിന്റെ പേര് പരിഗണനയിലുണ്ടായിരുന്നു. വ്യക്തിഗത വിഭാഗത്തില്‍ ഇന്ത്യയുടെ ഏക സ്വര്‍ണ മെഡല്‍ ജേതാവായ ബിന്ദ്രയ്ക്കുള്ള അംഗീകാരം കൂടിയാണിത്.
അതേസമയം പതാകയേന്താനുള്ള അവസരത്തെ അംഗീകാരമായി കാണുന്നുവെന്ന് ബിന്ദ്ര വ്യക്തമാക്കി. എന്നാല്‍ ഇതു തന്റെ അവസാന ഒളിംപിക്‌സാണെന്നും റിയോയിലെ മത്സരങ്ങള്‍ക്ക് ശേഷം വിരമിക്കുമെന്നും താരം കൂട്ടിച്ചേര്‍ത്തു.