ജിദ്ദ: സഊദിയിലെ കിഴക്കൻ പ്രവിശ്യയിലെ ദമ്മാമിലെ ദഹ്റാനിൽ വാഹനം തടഞ്ഞുനിർത്തി വെടിവെപ്പ് നടത്തിയ പ്രതിയെ പോലീസ് അറസ്റ്റ് ചെയ്തു. ഇന്ത്യക്കാരനായ ഡ്രൈവർ ഓടിച്ച വാഹനത്തിൽ സ്വദേശികളായിരുന്നു യാത്ര ചെയ്തിരുന്നത്. സ്വദേശി യുവതി മരിക്കുകയും രണ്ട് സ്വദേശി പൗരനും ഇന്ത്യക്കാരനായ ഡ്രൈവർക്ക് പരിക്കേൽക്കുകയും ചെയ്തു.
ഒരു സ്വദേശി കുടുംബം യാത്ര ചെയ്ത കാറിനെ പിന്തുടർന്ന് ഓവർടേക്ക് ചെയ്തായിരുന്നു വെടിവെപ്പ് നടത്തിയത്. വാഹനം ഓവർടേക്ക് ചെയ്ത് തടഞ്ഞു നിർത്തിയാണ് തുരുതുരാ വെടിയുതിർത്തത്. സ്വദേശി പൗരനായ പ്രതിയെ ദമ്മാം സുരക്ഷാ വിഭാഗമാണ് പിടികൂടിയത്.

വെടിവെപ്പിനെ തുടർന്ന് കാറിലുണ്ടായിരുന്ന ഒരു സ്വദേശി യുവതി കൊല്ലപ്പെട്ടു. മറ്റു രണ്ടു സ്വദേശി യാത്രികർക്കും ഇന്ത്യക്കാരനായ ഡ്രൈവർക്കും ഗുരുതരമായ പരിക്കേൽക്കുകയും ചെയ്തു. പരിക്കേറ്റവരെ ആശുപത്രിയിൽ പ്രവേശിപ്പിച്ചു. അതേ സമയം ആക്രമണത്തിന്റെ കാരണം വ്യക്തമായിട്ടില്ല. പൊലീസ് അന്വേഷണം ആരംഭിച്ചിട്ടുണ്ട്.