റിയാദ്: റിയാദ് അടക്കം സൗദി അറേബ്യയുടെ വിവിധ പ്രവിശ്യകള്‍ വീണ്ടും അതി ശൈത്യത്തിന്റെ പിടിയില്‍. ചിലയിടങ്ങളില്‍ മഞ്ഞ് വീഴ്ച അനുഭപ്പെടുമ്പോള്‍ മധ്യ, കിഴക്കന്‍ പ്രവിശ്യയിലെ പലയിടങ്ങളിലും ശക്തമായ മഴയും ലഭിച്ചു. ദിവസങ്ങളായി തുടരുന്ന ശൈത്യം ഇടക്ക് ശക്തി കുറഞ്ഞെങ്കിലും വീണ്ടും ശക്തി പ്രാപിക്കുകയായിരുന്നു. തബൂക്ക്, അല്‍ ജൂഫ്, ഹായില്‍, സക്കാക്ക, അബഹ, അസീര്‍ തുടങ്ങിയ നഗരങ്ങളെല്ലാം അതിശക്തമായ തണുപ്പിന്റെ പിടിയിലാണ്.

ശനിയാഴ്ച തെക്ക് പടിഞ്ഞാറന്‍ നഗരമായ നജ് റാനിലും പടിഞ്ഞാറന്‍ നഗരമായ അല്‍ ബഹയിലും പൊടിയും ഇടിമിന്നലും ശക്തമായ കാറ്റും വീശുമെന്ന് കാലാവസ്ഥാ നിരീക്ഷണ വിഭാഗം മുന്നറിയിപ്പ് നല്‍ കിയിട്ടുണ്ട്. തബൂക്ക് മേഖലയില്‍ മഞ്ഞ് വീഴ്ചയും മഴയുമുണ്ടാകാന്‍ സാധ്യതയുണ്ട്. ജിസാന്‍, അസീര്‍ എന്നിവിടങ്ങളിലും ഇടിമിന്നലും ശക്തമായ കാറ്റുമുണ്ടാവും. കിഴക്കന്‍ പ്രവിശ്യയിലും ശക്തമായ പൊടിക്കാറ്റിന് സാധ്യതയുണ്ടെന്നാണ് കാലാവസ്ഥാ നിരീക്ഷണ വിഭാഗം അറിയിച്ചിരിക്കുന്നത്. ഇവിടങ്ങളിലെല്ലാം ജാഗ്രതാ നിര്‍ദ്ദേശം നല്‍ കിയിട്ടുണ്ട്. വരും ദിനങ്ങളില്‍ തണുപ്പിന്റെ കാഠിന്യം കൂടുമെന്നാണ് വിലയിരുത്തപ്പെടുന്നത്