കല്‍പ്പറ്റ: കുടിവെള്ളത്തിനായി ജനം നെട്ടോട്ടമോടുമ്പോഴും വാട്ടര്‍ അതോറിറ്റിയുടെ പൈപ്പുകള്‍ പൊട്ടി ജലം പാഴാകുന്നത് പതിവ് കാഴ്ചയാകുന്നു. ദിനം പ്രതി അയിരക്കണക്കിന് ലിറ്റര്‍ ജലമാണ് വാട്ടര്‍ അതോറിറ്റി അധികൃതരുടെ അനാസ്ഥ കാരണം പാഴാകുന്നത്.
കല്‍പ്പറ്റ നഗരസഭയിലെ ഗൂഡല്ലായി കുന്നില്‍ വാട്ടര്‍ അതോറിറ്റിയുടെ പൈപ്പ് രണ്ടിടത്തായാണ് പൊട്ടിയിരിക്കുന്നത്. ഇവിടങ്ങളില്‍ രണ്ടാഴ്ചയായി വെള്ളം പാഴാകുകയാണ്. പൈപ്പ് പൊട്ടിയ വിവരം നാട്ടുകാര്‍ അധികൃതരെ അറിയിച്ചെങ്കിലും ഇതുവരെ യാതൊരു നടപടിയുമുണ്ടായിട്ടില്ല. ജലം പാഴാക്കുന്നത് പരിശോധിക്കുമെന്നും കര്‍ശന നടപടി സ്വീകരിക്കുമെന്നും ഈയിടക്കാണ് വാട്ടര്‍ അതോറിറ്റി പ്രഖ്യാപിച്ചത്. എന്നാല്‍ പൈപ്പ് പൊട്ടി ജലം പാഴാകുന്ന വിവരമറിഞ്ഞിട്ടും പ്രശ്‌നം പരിഹരിക്കാന്‍ അധികൃതര്‍ക്ക് ഇതുവരെ സമയം കിട്ടിയിട്ടില്ല.
ഗൂഡല്ലായി കുന്നില്‍ വെള്ളം കുത്തി ഒഴുകുന്നത് കാരണം കാപ്പി ചെടികളും കൃഷിഭൂമിയും കല്‍മതിലും ഇടിഞ്ഞു വീണിട്ടുണ്ട്. പൈപ്പ് പൊട്ടി വെള്ളം പാഴാവുന്നതിനാല്‍ ഗൂഡല്ലായി ഉള്‍പെടെയുള്ള പ്രദേശങ്ങളില്‍ വെള്ളം ലഭിക്കാത്ത സ്ഥിതിയാണ്. ആയിരകണക്കിന് കുടുംബങ്ങള്‍ക്ക് ആശ്രയമായ പദ്ധതിയാണിത.് കാരാപ്പുഴ പദ്ധതിയുടെ പൈപ്പും വ്യാപകമായി പൊട്ടിയിട്ടുണ്ട്. എമിലി, പള്ളിതാഴേ, പുത്തൂര്‍വയല്‍ എന്നിവിടങ്ങളിലാണ് കാരാപ്പുഴയുടെ പൈപ്പ് പൊട്ടി വെള്ളം പാഴാവുന്നത്.